Almatyda 300-ge jýyq jas sarbaz áskerı ant qabyldady
ALMATY. KAZINFORM – Desanttyq-shabýyldaý áskerleriniń 61993 áskerı bóliminde 300-ge jýyq jas desantshy áskerı ant qabyldady.
Qorǵanys mınıstrliginiń habarlaýynsha, atalǵan is-sharaǵa Astana, Shymkent jáne Qazaqstannyń basqa da qalalarynan shaqyrylǵan sarbazdardyń ata-analary men jaqyndary jınalǵan.
Áskerge shaqyrylǵan jastar bir aılyq jas jaýynger kýrsynan ótti. Osy ýaqyt ishinde olar saptyq daıyndyq elementterine mashyqtandy. Qoıan-qoltyq urys tehnıkasyn úırendi. Kózderin baılap qarýdy bólshekteý men qurastyrýǵa jattyqty. Munyń bári saltanatty rásimge kelgen qonaqtarǵa kórsetildi.
Shymkentten shaqyrylǵan qatardaǵy jaýynger Qanat Ómirzaqov – joǵary bilimdi qurylysshy. Áskerge deıin medıtsınalyq jabdyqtardy qondyrý ınjeneri bolyp jumys istegen. Áskerge bara jatyp, ushqysh bolsam degen kópten bergi armanyn júzege asyrýǵa sheshim qabyldapty.
– Jergilikti áskerı basqarý organynda bolǵanda merzimdi qyzmetti ótkergen soń elimizdegi joǵary oqý oryndardyń birine grantqa úmitker bola alatynymdy bildim. Alda Azamattyq avıatsııa akademııasyna oqýǵa túsý úshin laıyqty qyzmet etýge nıettimin, - dedi Qanat.
61993 áskerı bóliminiń komandıri podpolkovnık Danııar Karmanov ata-analarmen júzdesip, uldarynyń bolashaq qyzmetteri týraly aıtty.
Іs-shara sońynda jas sarbazdar jaqyndarymen birge alǵashqy seıilge shyqty.
Áskerı ant berý is-sharalary Desanttyq-shabýyldaý áskerleriniń Almaty, Jetisý jáne Qonaev garnızondarynda ornalasqan áskerı bólimderinde bir mezgilde ótti. Onda bıylǵy kóktemde shaqyrylǵan 1 500-den astam jas sarbaz Otanǵa adal bolýǵa ant berdi.
