Almatyda 30 jylǵa jýyq jóndeýden ótpegen mektep qashan jańǵyrtylady
ALMATY. KAZINFORM - Almatynyń ortalyǵynda 1960 jyly salynǵan mektep jumys istep tur. Bul bilim ordasynda sońǵy ret jóndeý jumystary 27 jyl buryn jasalǵan.
Áleýmettik jelide “Almatydaǵy eń eski mektep”, “eń qorqynyshty mektep” degen ataýmen №73 mektep-gımnazııasynyń fotolary men beınejazbasy tarady. Onda Bostandyq aýdanynda ornalasqan mektepte jóndeý jumystary osy jyldyń 2 kvartalynda bastalýy kerek ekeni, biraq eshqandaı jumys istelmegeni jazylǵan.
Osyǵan oraı, Kazinform tilshisi Almaty qalasynyń Bilim basqarmasyna saýalhat joldady. Basqarma jaýabynda búgingi kúni oqý ordasynda 1041 bala bilim alyp, 83 muǵalim sabaq beretini aıtylǵan.
- №73 mektep-gımnazııasy 1960 jyly salynǵan. Sońǵy ret 1997 jyly jóndeý jumystary júrgizilgen. Búgingi tańda 1041 oqýshy bilim alady, 83 muǵalim sabaq beredi. Jóndeý jumystary 2024 jyldyń 4 kvartalynda bastalady. Jóndeý jumystary kezinde oqýshylar №40 jalpy bilim beretin mektepte jáne №146 mektep-lıtseıde oqıtyn bolady, - dep habarlady qalalyq Bilim basqarmasynan.
Eske salaıyq, buǵan deıin Atyraýda salynyp jatqan 2 jaıly mekteptiń qurylysynan kemshilik anyqtalǵanyn jazǵan edik.
Sondaı-aq 2025 jyldyń sońyna deıin zamanaýı úlgidegi 217 mektep salynady.
