Almatyda 3 adamnyń ómirin qıǵan avtobýs apaty: Sot úkimi shyqty

ALMATY. KAZINFORM — Almatyda úsh adamnyń ólimine ákep soqqan jol apatyna kináli № 47-baǵyttaǵy avtobýstyń jolaýshysyna qatysty sot úkimi shyqty.

Almaty qalasynyń qylmystyq ister jónindegi mamandandyrylǵan aýdanaralyq sotynda QR Qylmystyq kodeksiniń 351-babynyń 3-bóligi jáne 293-babynyń 1-bóligi boıynsha Ahmetjanovqa qatysty qylmystyq is qaraldy.

Sot Darhan Ahmetjanovty 8 jylǵa bas bostandyǵynan aıyrdy. Ol jazasyn eń tómengi qaýipsizdik mekemesinde óteıtin bolady.

Sot úkimi zańdy kúshine engen joq.

25 sáýir kúni prokýror sottan D. Ahmetjanovty kináli dep tanyp, ony segiz jylǵa bas bostandyǵynan aıyrýdy suraǵan edi.

Buǵan deıin sottalýshy Ahmetjanov 293-baptyń 1-bóligi («Buzaqylyq») boıynsha ǵana kinásin moıyndap, adamdardyń ólimine júrgizýshini kinálaǵan bolatyn.

Aıta keteıik, QR Joǵarǵy Soty Almatydaǵy avtobýs apatyna qatysty kezekti sot otyrysyn tikeleı efırde kórsetý týraly sheshim qabyldady. Sol sebepti kezekti sot otyrysynyń onlaın translıatsııasy Joǵarǵy Sottyń YouTube-kanalynda kórsetildi.

Eske salsaq, ótken jyly jeltoqsan aıynda Almatyda № 47-shi baǵyttaǵy qoǵamdyq kóliktiń ishinde Darhan Ahmetjanov janjal shyǵaryp, júrgizýshi áıeldi urǵan. Saldarynan áıel esinen tanyp, kólikti basqara almaı, aıaldamada turǵan bir top adamdy qaqqan. Apat saldarynan 7 adam zardap shegip, 3 adam qaıtys boldy.

Osyǵan baılanysty sotttalýshy Darhan Ahmetjanovqa qatysty sot otyrysy bıyl 20 naýryzda bastalǵan edi.