Almatyda 288 múmkindigi shekteýli adam tehnıkalyq ońaltý quralymen qamtyldy
ALMATY. KAZINFORM – Bıyl múgedektigi bar 288 almatylyqty ońaltýdyń ınnovatsııalyq tehnıkalyq quraldarymen qamtamasyz etý úshin jergilikti bıýdjetten 1 396 550 myń teńge bólindi.
Almaty qalasy ákimdiginen atap ótkendeı, 2023 jyly memlekettik satyp alý arqyly 1 390 mln teńgege 433 adam ońaltýdyń ınnovatsııalyq tehnıkalyq quraldarymen qamtamasyz etildi. Atap aıtsaq, 150 protez, 200 arba, 76 sóıleý protsessory jáne 7 súıek ótkizgish estý apparaty.
«2024 jyly múgedektigi bar 288 adamdy ońaltýdyń ınnovatsııalyq tehnıkalyq quraldarymen qamtamasyz etý úshin jergilikti bıýdjetten 1 396 550 myń teńge bólindi. Osylaısha, 208 adamǵa 804 050 myń teńgeniń arbasy berildi, 60 adamnyń protezdik-ortopedııalyq quraldaryna 472 500 myń teńge jumsaldy, 20 adamnyń sóıleý protsessory, súıek ótkizgishtigi bar estý apparatyna 120 000 myń teńge jumsaldy», - dep habarlady ákimdikten.
Arnaıy jabdyq alǵandardyń biri Baýyrjan Mekenbaıuly, múgedek arbasynyń sapasy joǵary ekenin aıtty.
«Men múgedekter arbasyna óte rıza boldym. Arbanyń dızaıny óte joǵary deńgeıde jasalǵan, materıaldardyń sapasy da jaqsy. Oryndyq óte yńǵaıly jáne jaıly, jumsaq jastyqtary bar, júrip-turýǵa óte yńǵaıly. Arba jeńil ári ońaı burylady, tipti tar bólmede de basqarý ońaı. Mundaı arbalar ómir sapasyn jaqsartýǵa kómektesip, kúndelikti ómirde yńǵaılylyq pen jaılylyqty qamtamasyz etedi» - dedi Baýyrjan Mekenbaıuly.