Almatyda 275 adamdy san soqtyrǵan qarjy pıramıdasy áshkere boldy
ALMATY. KAZINFORM – Almatyda tutyný kooperatıvi atyn jamylyp jumys istegen «R.O.I.» qarjy pıramıdasyna qatysty tergeý júrgizilip jatyr. Qazirgi ýaqytta 275 azamat jábirlenýshi dep tanyldy. Olarǵa keltirilgen jalpy shyǵyn 217 mln teńgeni qurady.
Qarjylyq monıtorıng agenttiginiń málimetinshe, uıymdastyrýshylar azamattardy jyljymaly jáne jyljymaıtyn múlik satyp alý baǵdarlamalaryna qatysýǵa shaqyrǵan. Ol úshin úlestik jarna jınaqtaý týraly sharttar jasalyp, turǵyndardan aqsha jınalǵan.
Alaıda jańa qatysýshylardan túsken qarajat naqty kásipkerlik qyzmetke emes, kooperatıvke buryn qosylǵan músheler aldyndaǵy mindettemelerdi óteýge jumsalǵan.
– Tergeý barysynda uıymdastyrýshylar keńes berý qyzmetiniń aqysy degen jeleýmen kooperatıvten 94 mln teńgeni ózderimen baılanysy bar tulǵalardyń, sonyń ishinde «Káýsar» jeke kásipkerliginiń esepshottaryna aýdarǵany anyqtaldy, – dep habarlady agenttik.
Sonymen qatar 2022 jyly sot daýlary bastalǵannan keıin Almatyda «ShynSaulet», «Berekeli Shanyrak», «Aya-Aru», «Jasmin», «USCoop» jáne «Baiterek» atty alty jańa tutyný kooperatıvi qurylǵan.
Tergeý málimetinshe, atalǵan uıymdar «R.O.I.» tutyný kooperatıvi basshysynyń baqylaýynda bolǵan. Olar jeke sot oryndaýshylary buǵattaǵan negizgi kooperatıvtiń bank shottaryn aınalyp ótip, túsken qarajatty basqa esepshottarǵa baǵyttaý úshin paıdalanylǵan.
Qarjy pıramıdasyn uıymdastyrdy degen kúdikti eki aıǵa qamaýǵa alyndy.
Sot sanktsııasymen úsh avtokólikke, 25 páterge jáne bank shottaryna tyıym salyndy.
Qazirgi ýaqytta tergeý jalǵasyp jatyr. Qylmystyq-protsestik kodekstiń 201-babyna sáıkes ózge málimetter jarııa etilmeıdi.
Aıta keteıik, buǵan deıin Almatyda 90 myńǵa jýyq adamnan 25 mlrd teńge jınaǵan «Asar Baspana» qarjy pıramıdasynyń uıymdastyrýshylary sottalǵan bolatyn.
