Almatyda 266 bala qyzylshaǵa qarsy vaktsına aldy
Almaty qalasynda qyzylshaǵa qarsy qosymsha jappaı ımmýndaý aıasynda 266 bala egildi, dep habarlaıdy Kazinform.
Almaty qalasy Sanıtarııalyq-epıdemıologııalyq baqylaý departamenti basshysynyń orynbasary Ásel Qalyqovanyń aıtýynsha, qazirgi ýaqytta megapolıste qyzylshamen syrqattanýshylyq boıynsha epıdemıologııalyq jaǵdaı turaqsyz.
Balalar arasyndaǵy aýrýshańdyq negizinen vaktsınatsııadan bas tartý sebebinen bolyp otyr. Sondaı-aq vaktsınatsııadan medıtsınalyq bosatý jáne egý jasyna jetpeý saldarynan tirkelip jatyr.
«Qyzylshany juqtyrýdan, sondaı-aq olardyń asqynýynyń aldyn alatyn jalǵyz tıimdi qural tek vaktsınatsııa. Qyzylshaǵa qarsy josparly vaktsınatsııa 2 ret, birinshisi – 1 jasta (12-15 aı), ekinshisi – 6 jasta júrgiziledi, bul vaktsınatsııadan keıingi ımmýnıtetti damytýǵa múmkindik beredi. Qyzylshaǵa qarsy vaktsınanyń árbir alynǵan dozasy balanyń ımmýnıtetin kúsheıtedi»,- deıdi ol.
Ekpelerdi júrgizý úshin DDU sertıfıkattaǵan jáne Qazaqstan Respýblıkasynda tirkelgen qyzylshaǵa, qyzamyqqa, epıdemııalyq parotıtke qarsy aralas vaktsına qoldanylady. Vaktsınatsııa turǵylyqty jeri boıynsha qalanyń emhanalarynyń barlyq egý kabınetterinde tegin júrgiziledi.
Ásel Qalyqova elimizdiń bas sanıtarlyq dárigeriniń qaýlysyna sáıkes Almatyda qosymsha jappaı ımmýndaý jumystary qolǵa alynǵanyn aıtty.
Qalanyń medıtsınalyq uıymdarynda qyzylshaǵa qarsy qosymsha jappaı ımmýndaý kontıngentiniń tizimi jasaldy. Árbir aýdanda jáne árbir medıtsınalyq uıymda is-sharalar jospary ázirlendi. Dáriger, medbıke (vaktsınator), medregıstrator quramynda tájirıbeli oqytylǵan mamandar qatarynan qosymsha egý brıgadalary quryldy.
«Qyzylshaǵa qarsy vaktsınatsııa kezeń-kezeńimen ótkiziletin bolady. Qyzylshaǵa, qyzamyqqa, parotıtke qarsy vaktsınanyń bar qaldyǵyn eskere otyryp, 6 aıdan bastap 10 aı 29 kúnge deıingi balalardy qyzylshaǵa qarsy ımmýndaý bastaldy jáne qyzylshamen syrqattaný boıynsha epıdemıologııalyq jaǵdaı turaqtanǵanǵa deıin jalǵasatyn bolady. Osy jyldyń 10-13 qarashasy aralyǵynda qosymsha jappaı ımmýndaý sheńberinde qyzylshaǵa qarsy 266 bala egildi»,- dedi epıdemıolog.
