Almatyda 260 shaqyrym sý qubyry jelisi salynyp, qaıta jańǵyrtylady
ALMATY. KAZINFORM – Bıyl Almaty qalasynyń turǵyndaryn sýmen qamtý deńgeıi 99,6%-dan 99,9%-ǵa deıin artady.
Bıyl 190 km jeli salýǵa jáne jańǵyrtýǵa 23 kelisimshart jasalyp, qazir 16,3 shaqyrym sý jelisi salyndy. Aqsaı» ózenindegi sý alatyn qurylǵynyń qurylysy 85%-ǵa oryndaldy. Al «Ermensaı» nysany boıynsha merdigerdi tańdaý úshin 2025 jyly 9 sáýirde baıqaý jarııalandy.
– Sýdy únemdi paıdalaný maqsatynda jyl basynan beri 39 myń jeke sý eseptegish qurylǵy ornatyldy, onyń ishinde 8,9 myńy – sáýirde. Bul eseptegishpen jabdyqtaý deńgeıin 2024 jylǵy 67%-dan 2025 jyldyń sáýirinde 75%-ǵa deıin jetkizdi. Jyl sońyna qaraı bul kórsetkish 90%-ǵa jetedi dep josparlanyp otyr. Jalpy bıyl turǵyndardy sapaly sýmen qamtamasyz etý úshin 260 km sýmen jabdyqtaý jelileri salynyp, rekonstrýktsııalanady, – delingen qala ákimi Erbolat Dosaevtyń 1-30 sáýir aralyǵyndaǵy Prezıdentke bergen esebinde.
Aıta keteıik, 2025 jyldyń sáýir aıynda Almaty ákimdigi ázirlegen is-sharalar josparynda Prezıdent Qasym-Jomart Toqaevtyń tapsyrmalaryn oryndaýǵa arnalǵan qalany turaqty damytýǵa baǵyttalǵan 41 is-shara qarastyrylǵan.
– Memleket basshysy úshin tapsyrmalardyń oryndalý barysy týraly esep belgilengen kestege sáıkes qalyptastyrylady jáne usynylady, - dep atap ótti ákimdikten.
Eske salaıyq, Prezıdent Qasym-Jomart Toqaev Almatyǵa jumys sapary kezinde qala ákimi Erbolat Dosaevty qabyldap, shahardy jaryqtandyrý, páterlerge sýdy ýaqytyly jáne tolyq berý, kósheler men aýlalardy abattandyrý boıynsha birqatar tapsyrma bergen bolatyn.