Almatyda 250 mln teńge bıýdjet qarajatyn zańsyz jumsamaq bolǵandar anyqtaldy

ALMATY. KAZINFORM – Almaty qalasy Almaly aýdanynyń prokýratýrasy qyzmetkerlerdi mindetti saqtandyrý shartyn jasasý kezinde «Almatyelektrotrans» JShS-da memlekettik satyp alý týraly zańdy buzý faktisin anyqtady.

Almaty qalasy prokýratýrasynyń málimetinshe, buzýshylyq qyzmetkerlerdi mindetti saqtandyrý shartyn elektrondyq memlekettik satyp alý portalyn aınalyp ótý arqyly jáne qaǵaz túrinde zańsyz jasalǵanynan belgili boldy.

Prokýratýranyń qoldanǵan sharalary nátıjesinde mindetti saqtandyrý sharty sot tártibimen buzyldy. 250 mln teńge bıýdjet qarajaty memleket kirisine ótelip, kináli tulǵalar ákimshilik jaýapqa tartyldy.