Almatyda 25 mıllıard teńge tartqan qarjy pıramıdasynyń basshysy sottaldy
ALMATY. KAZINFORM – Almatyda Almaly aýdandyq soty «AB» qarjy pıramıdasyn uıymdastyrǵan jáne oǵan qatysqan bir top adamǵa úkim shyǵardy.
Sot materıaldaryna sáıkes, 2023 jyldyń qańtarynda T esimdi adam «PK AB» tutyný kooperatıviniń baǵdarlamalaryna qatysý syltaýymen qarjy pıramıdasyn uıymdastyrǵan. Olarǵa tabys tabý, avtokólik nemese baspana satyp alý múmkindigi usynylǵan.
Kóp salymshy tartý maqsatynda Qazaqstannyń túrli qalalarynda keńseler jumys istep, kezdesýler men onlaın is-sharalar ótkizilgen. Onda baǵdarlamalardyń sharttary túsindirilip, tıisti nusqaýlar berilgen.
Keıin atalǵan qyzmetke B., D., I. jáne óńirlik basshylar tartylǵan. Olar jańa qatysýshylardy tartýmen, keńselerdiń jumysyn uıymdastyrýmen, aqshany baqylaýdaǵy shottarǵa aýdarýmen aınalysqan.
- Tartylǵan qarajat qatysýshylar aldyndaǵy mindettemeler úshin kásipkerlik qyzmetke paıdalanylmaǵan. Aqsha júıe qatysýshylary arasynda qaıta bólinip, bonýstar tóleýge, sharýashylyq shyǵyndaryna jáne ózge de maqsattarǵa jumsalǵan, - delingen sot úkiminde.
Jalpy «AB» azamattardan 25,4 mlrd teńge alǵan.
Sottalýshylar ózderine taǵylǵan aıyptardy moıyndamaı, aqtaý úkimin shyǵarýdy surady.
Sot úkimimen T esimdi adam Qylmystyq kodekstiń 217-baby 2-bóligi 2-tarmaǵy “Qarjy pıramıdasyn qurý jáne basshylyq etý” boıynsha kináli dep tanylyp, 8 jylǵa bas bostandyǵynan aıyryldy.
Sondaı-aq oǵan 7 jyl qarjylyq qyzmetpen aınalysý quqyǵynan aıyrý jazasy taǵaıyndaldy.
B., D. jáne I. osy bap boıynsha 7 jylǵa bas bostandyǵynan aıyryldy. Onymen qosa 6 jylǵa qarjylyq qyzmetpen aınalysý quqyǵynan aıyrý jazasy taǵaıyndaldy.
Eske salsaq, kún saıyn tabys tabýdy ýáde etken CVK qarjy pıramıdasyn uıymdastyrýshy sottalǵan edi.
