Almatyda 224 zeınetker «Altyn jas» jobasymen jumysqa ornalasty
ALMATY.KAZINFORM - Almatyda «Altyn jas» baǵdarlamasy boıynsha 224 zeınetker jumysqa ornalasty. Olardyń ortasha jalaqysy 187 myń teńge. Bul týraly Almaty ákimdigi málim etti.
Almatylyq zeınetker Ǵalııa Áshirbekovanyń aıtýynsha, uzaq ýaqyt jumys taba almaı, talaı mekemeniń tabaldyryǵyn tozdyrǵan.
«Zeınetkerlikke shyqqannan keıin uzaq ýaqyt jumys tabýǵa tyrystym, biraq meniń zeınetker mártebemdi eskere otyryp, jumys berýshiler únemi qabyldamady. Osydan keıin men Almaty qalasynyń Eńbek mobıldiligi ortalyǵyna júgindim, onda maǵan «Altyn jas» baǵdarlamasyna qatysý usynyldy. Bul baǵdarlamaǵa qatysý maǵan eńbek qyzmetin jalǵastyrýǵa jáne qajetti materıaldyq deńgeıdi saqtaýǵa múmkindik berdi. Qala bıligi qoǵamnyń ıgiligi úshin jumys istegisi keletin jáne jumys isteı alatyn zeınetkerler sııaqty halyqtyń áleýmettik osal sanatyn umytpaǵanyna óte rızamyn», - deıdi zeınetker Ǵalııa Áshirbekova.
Almaty qalasy ákimdiginen atap ótkendeı, «Altyn jas» baǵdarlamasyna qalanyń 94 uıymy qatysty. Qazir zeınetkerlik jastaǵy adamdardy jumysqa ornalastyrý úshin uıymdardyń qosymsha tizimi qalyptastyrylyp jatyr.
«Osy jyldyń maýsym aıynda Almaty ákimi Erbolat Dosaevtyń bastamasymen zeınetkerlerdi jumysqa ornalastyrý boıynsha «Altyn jas» baǵdarlamasy bekitildi. Oǵan Almatyda tirkelgen jáne turaqty negizde turatyn zeınetkerlik jastaǵy adamdar qatysa alady. Baǵdarlama jergilikti bıýdjetten jalaqynyń 50% mólsherinde, biraq tıisti qarjy jylyna belgilengen bir eń tómengi jalaqydan aspaıtyn mólsherde sýbsıdııalaýdy kózdeıdi. 2024 jyly bul soma 85 myń teńge boldy. Atalǵan baǵdarlama boıynsha 224 zeınetker jumysqa ornalasty. Olardyń ortasha jalaqysy 187 myń teńge», - dep habarlady ákimdikten.
Osyǵan deıin Almatyda halyqty jumyspen qamtýǵa baǵyttalǵan sharalardyń arqasynda qalada jumyssyzdyq deńgeıi alǵashqy jarty jyldyqta 5% - dan 4,7% - ǵa deıin tómendegeni týraly jazǵan edik.
