Almatyda 214 qurylys kompanııasynyń lıtsenzııasy toqtatyldy
ALMATY. KAZINFORM – Almatyda qurylys salasyndaǵy zań talaptaryn buzǵan kompanııalarǵa qatysty baqylaý kúsheıtilip, júzdegen uıymnyń lıtsenzııasyna shekteý qoıyldy.
Ákimdiktiń Qala qurylysyn baqylaý basqarmasynyń málimetinshe, júrgizilgen tekserýler nátıjesinde birqatar qurylys jáne jobalaý uıymdarynyń lıtsenzııalary qaıtarylyp, keıbiriniń qyzmeti ýaqytsha toqtatylǵan.
Atap aıtqanda, «QazǴZSQA» AQ-nyń enshiles uıymy – «QazQSǴZI» AQ qurylys qyzmetin júzege asyrý lıtsenzııasynan aıyryldy. Buǵan kompanııada qurylys lıtsenzııasyn alý úshin mindetti sanalatyn óndiristik bazanyń bolmaýy sebep bolǵan.
Sondaı-aq qurylys normalaryn birneshe ret buzyp, ýákiletti organnyń eskertýlerin oryndamaǵan «Sáýlet Qurylys Konsaltıngi» JShS-niń lıtsenzııasy keri qaıtaryldy.
– Qurylys salasyndaǵy zańbuzýshylyqtardy anyqtaý jáne jolyn kesý baǵytyndaǵy júıeli jumystar nátıjesinde birqatar qurylys jáne jobalaý uıymyna qatysty ákimshilik sharalar qabyldanyp, memlekettik lıtsenzııalary toqtatyldy nemese qaıtaryp alyndy, – dep habarlady basqarma.
Ákimshilik sharalar jobalaý uıymdaryna da qatysty qoldanyldy. Máselen, «SK BEST Spec Story KZ» JShS І sanattaǵy jobalaý lıtsenzııasynan aıyrylsa, «Otaý-Qurmet» JShS qurylys talaptaryna sáıkes kelmeýi jáne bekitilgen jobalyq sheshimderden aýytqýy sebepti lıtsenzııasynan aıyrylǵan.
Budan bólek, qala prokýratýrasynyń usynysy negizinde 214 qurylys kompanııasynyń lıtsenzııasy ýaqytsha toqtatyldy. Vedomstvo málimetinshe, bul uıymdar belgilengen biliktilik talaptaryna sáıkes kelmegen.
– Lıtsenzııa tek barlyq zańbuzýshylyq tolyq joıylyp, belgilengen talaptarǵa sáıkestigi rastalǵannan keıin ǵana qaıta qalpyna keltiriledi, – delingen habarlamada.
Qala ákimdigi qurylys salasyndaǵy baqylaý jumystary aldaǵy ýaqytta da jalǵasatynyn atap ótti. Bul jumystar qala ákimi Darhan Satybaldynyń tapsyrmasy aıasynda júrgizilýde.
Aıta keteıik, Almatyda 200 jer telimi memleket muqtajyna alynady.
