Almatyda 21 jastaǵy jigit kópqabatty úıdiń balkonynan qulap qaza tapty
ALMATY. KAZINFORM — Almatynyń Bostandyq aýdanynda qaıǵyly jaǵdaı boldy.
Polıtsııanyń málimetinshe, kópqabatty turǵyn úıdiń ortaq balkonynan qulaǵan 21 jastaǵy er adam alǵan jaraqatynan oqıǵa ornynda kóz jumdy.
Oqıǵa ornyna polıtsııa qyzmetkerleri men jedel qyzmet ókilderi kelgen. Qaıtys bolǵan azamattyń jeke basy anyqtaldy.
— Aldyn ala aqparat boıynsha, oqıǵa aldynda jas jigit aýa raıynyń ystyǵyna qaramastan syrt kıimmen júrgen. Bul jaıt jáne basqa da mán-jaılar tergeý barysynda tekseriledi, — delingen habarlamada.
Bul derek boıynsha Bostandyq aýdandyq polıtsııa basqarmasy qylmystyq is qozǵady.
Qazir tergeýshiler qaıǵyly oqıǵanyń sebepterin anyqtap, marqumnyń ómir salty, aınalasy jáne iske qatysty ózge de mán-jaılardy zerttep jatyr.
Eske salaıyq, buǵan deıin Almatyda jigitimen janjaldasqan qyz turǵyn úıdiń 10-qabatynan qulap ketkenin habarlaǵanbyz.
