Almatyda 2030 jyly qoǵamdyq kólikke minetinder sany 64%-ǵa artýy múmkin
ALMATY. KAZINFORM - 2030 jylǵa qaraı Almatyda qoǵamdyq kólikpen táýligine qatynaý sanyn 2,3 mıllıonǵa deıin jetkizý josparlanyp otyr. Bul bastapqy kórsetkishten shamamen 64%-ǵa joǵary.
«Almatybasjospar» ǴZI basshysy Ashat Sádýovtyń aıtýynsha, negizgi mindetterdiń biri - qoǵamdyq kólikti turǵyndar úshin barynsha qolaıly etý.
Osy maqsatta aýdandar arasyndaǵy baǵytty damytý, qala ishinde ár joly ortalyq arqyly ótpeı-aq, kólik baılanystaryn qalyptastyrý kózdelgen.
- 2040 jylǵa qaraı Bas josparda jeke avtokólikti paıdalaný deńgeıin shamamen 20%-ǵa tómendetý qarastyrylǵan, - dedi Sádýov.
Sonymen qatar qoǵamdyq kólik jelileriniń jalpy uzyndyǵyn 981 shaqyrymnan 2030 jylǵa qaraı 1 040 shaqyrymǵa, al 2040 jylǵa qaraı 1 214 shaqyrymǵa deıin ulǵaıtý josparlanyp otyr.
Budan bólek jumys oryndary men kúndelikti qajetti qyzmetterdi turǵyn aýdandarǵa jaqyndatý úshin bes polıortalyqty damytý kózdelgen. Bul qala ishinde alys qashyqtyqqa qatynaý qajettiligin azaıtýǵa múmkindik beredi.
Halyq sanynyń boljamy naqtylanǵan saıyn jolaýshylar tasymalyna degen qajettilik te qaıta esepteledi.
Kólik júıesin damytý nátıjeleri jolǵa ketetin ýaqyt, qoǵamdyq kóliktiń qozǵalys jyldamdyǵy jáne aýdandar arasyndaǵy qatynaý qolaılylyǵy boıynsha baǵalanady.
Eske salsaq, Astanadaǵy LRT-da bir táýliktegi ortasha jolaýshy aǵyny qandaı ekeni aıtyldy.
