Almatyda 2030 jyly ár turǵynǵa 15 sharshy metr jasyl jelek bolady
ALMATY. KAZINFORM – Almatyda 2026 jylǵa arnalǵan kógaldandyrý jospary qaraldy.
Ekologııa jáne qorshaǵan orta basqarmasynyń málimetinshe, 2018-2019 jyldary júrgizilgen túgendeý qala aýmaǵynda 4,3 mıllıonnan astam aǵash ósetinin kórsetken. Alaıda vedomstvo jasyl jelekterdi ǵylymı negizde jáne júıeli basqarý maqsatynda 2026-2030 jyldarǵa arnalǵan jańa 5 jyldyq dendrologııalyq jospar ázirlenip jatqanyn atap ótti.
Qujat jasyl jelekti túgendeý men orman-patologııalyq zertteý nátıjelerin, sondaı-aq jasyl qordy saýyqtyrý, jańartý jáne ornyqty damytýǵa baǵyttalǵan keshendi sharalardy qamtymaq.
- 2026 jyly qalanyń barlyq aýdany boıynsha dendrologııalyq jospardy ázirleý jumystary aıaqtalady dep josparlanǵan. 2027 jyldan bastap kógaldandyrý jáne jasyl aımaqtardy jańartý jumystary bekitilgen qujatqa sáıkes júrgiziledi, - dep habarlady basqarmadan.
Vedomstvo málimetinshe, qazir kóshelerdi qaıta jańartý jumystary aıasynda bıiktigi 5-6 metr bolatyn iri kólemdi aǵashtar jáne qalalyq ortaǵa beıimdelgen butalar kezeń-kezeńimen otyrǵyzylyp júr. 2023-2025 jyldar aralyǵynda 1,06 mıllıonnan astam kóshet egilgen.
- 2030 jylǵa qaraı bir turǵynǵa shaqqandaǵy jasyl jelekpen qamtamasyz etý kórsetkishin 15 sharshy metrge deıin jetkizý josparlanǵan, - dep naqtylady basqarma ókilderi.
Eske salaıyq, buǵan deıin Almatyda 2 jylda jasyl jelektiń jaǵdaıy zertteýden ótetinin jazǵanbyz.
