Almatyda 2030 jylǵa deıin 100 km aryq qalpyna keltiriledi
ALMATY. KAZINFORM – Almatyda ashyq aryq jelileri men nóser kárizderi keńeıtiledi. Bul týraly qala ákimdigi habarlady.
Almaty ákimdiginiń málimetine sáıkes, qalada ashyq aryq jelisin saqtaý, qalpyna keltirý jáne keńeıtý jumystary júıeli túrde júrgizilip keledi. Bıyl bul jumystar qalanyń ortalyq, shyǵys jáne batys bólikterin qamtyǵan. Atap aıtqanda, ortalyq bólikte 76,6 shaqyrym, shyǵysta 30,7 shaqyrym, al batysta 37 shaqyrym aryq jelisin salý jáne qaıta jańǵyrtý jumystary júrgizilgen.
Ákimdik ókilderi qalanyń 2040 jylǵa deıingi túzetilgen Bas josparynda ashyq aryqtardy saqtaýǵa erekshe mán berilgenin atap ótti. Qujatqa sáıkes, aryqtardy qubyrlarǵa aýystyrýǵa tyıym salynady. Ashyq aryq salýǵa tehnıkalyq múmkindik joq keıbir ýchaskelerde ǵana qubyr paıdalanýǵa ruqsat etiledi.
- Almatyda aryq jelisin qysqartý emes, kerisinshe keńeıtý kózdelip otyr. 2030 jylǵa deıin keminde 100 shaqyrym aryq qalpyna keltirilip, Ál-Farabı jáne Abaı dańǵyldarynyń boıynda jańa magıstraldyq arnalar salynady. Al 2040 jylǵa qaraı ashyq sý burý jelisiniń uzyndyǵyn qazirgi 290 shaqyrymnan 483 shaqyrymǵa deıin jetkizý josparlanǵan. Sonymen qatar uzyndyǵy 357 shaqyrym bolatyn jabyq nóser kárizi salynady. Bul júıe qoldanystaǵy aryqtardy almastyrmaıdy, kerisinshe olardyń jumysyn tolyqtyrady, – dep habarlady ákimdikten.
Eske salaıyq, Úkimet Almaty qalasynyń 2040 jylǵa deıingi damý baǵyttaryn aıqyndaıtyn jańa Bas josparyn bekitti.
Buǵan deıin almatylyqtar jaýyn-shashyn saldarynan sý basqan kóshelerge shaǵymdanǵan bolatyn. Turǵyndar joldarda sý jınalýyna aryqtardyń beti jabylýy áser etýi múmkin ekenin aıtqan bolatyn.
Odan buryn Almatyda turǵyndardyń biri toby kóshedegi aryqtardyń betin jabýǵa qarsy bolyp, qarsy petıtsııa jarııalanǵanyn jazǵanbyz.