Almatyda 2026 jyly jańa arqan joldar men shańǵy trassalary salyna bastaıdy
ALMATY. KAZINFORM — Almaty ákiminiń orynbasary Oljas Smaǵulov Almaty taý klasterin damytýǵa baǵyttalǵan jumystar kelesi jyly bastalatynyn aıtty.
Onyń sózinshe, Shymbulaq pen Oı-Qaraǵaı taý kýrorttaryn aspaly arqan joldarynyń jelisi men taý shańǵy joldary arqyly biriktirý josparlanǵan.
— Birinshi kezeń kelesi jyly bastalady. Ol boıynsha Shymbulaq taý shańǵysy kýrortynda 2 jańa aspaly jol jáne 16 shaqyrymdyq trassa, al Kimasarda 4 aspaly jol men 18 shaqyrymǵa deıingi trassa salynady. Ekinshi kezeń Býtakovka (5 aspaly jol pen 22 shaqyrym trassa) jáne Oı-Qaraǵaı (4 aspaly jol men 12 shaqyrym trassa) aýmaqtarynyń damýyn qamtıdy. Bul kezeńdi júzege asyrý 2027–2028 jyldarǵa josparlanǵan. Úshinshi kezeń — Pıoner aımaǵyn ıgerý, ol ekinshi kezeńmen qatar júredi. Munda 4 aspaly joly, 20 shaqyrymǵa deıingi trassalar jabdyqtalady, — dedi ol.
Jalpy Almaty taýlarynda aspaly arqan joldardyń sany 16-dan 42-ge deıin ulǵaıady. Al syrǵanaýǵa jaramdy trassalar 41 shaqyrymnan 112-162 km-ge deıin uzarady.
Óńirlik kommýnıkatsııalar qyzmetinde ótken brıfıng barysynda Oljas Smaǵulov Almaty taý klasterin damytý jobasy nelikten qajet ekenin atap ótti. Sondaı-aq «joba taý ekojúıesine qaýip tóndirmeı me» degen suraqqa jaýap berdi.
— Bul jobany taýdaǵy jappaı qurylys retinde emes, retsiz týrızmnen qorǵanys retinde qarastyramyz. Búgingi kúni taýǵa shyǵatyndar kóp, «Shymbulaqqa» demalys kúnderi 15 myńdaı adam barady. Bul basynda jobalanǵan adamdar sanynan eki ese kóp. Basty talabymyz — ekologııaǵa zııan keltirmeı taý klasterin damytý. Sondyqtan jobalar júzege asyrylǵan kezde barlyq ekologııalyq talaptar eskeriledi. Bul jobalardyń arqasynda myńdaǵan jumys orny ashylady, 100 mlrd teńgedeı mlrd salyq túsedi dep kútemiz. Bul baǵytta bizdiń kórshilerimiz — Ózbekstan, Qyrǵyzstan úlken jumys júrgizip jatyr, sondyqtan taý týrızminde básekelestik joǵary. Biraq bizdiń maqsatymyz — jumysty zań aıasynda durys oryndaý, — dedi ol.
Eske salaıyq, buǵan deıin Almaty taý klasteri qalaı damıtynyn jazǵanbyz.