Almatyda 2026 jyly MÁMS júıesine 95 myń turǵyn qosylady
ALMATY. KAZINFORM – Almatyda jarty mıllıonǵa jýyq adam MÁMS júıesinen tys qalyp otyr.
Medıtsınalyq saqtandyrý qory Almaty qalalyq fılıaly dırektorynyń orynbasary Nurdos Qadyrbekovtyń aıtýynsha, megapolıste turatyn 2,3 mln halyqtyń 80 paıyzy nemese 1,8 mln saqtandyrylǵan. Biraq 475 myń adam MÁMS júıesinen tys qalyp otyr.
MÁMS týraly zańǵa engizilgen ózgeristerge sáıkes, 2026 jyldan bastap jergilikti atqarý organdary halyqtyń áleýmettik jaǵdaıy tómen bóligi úshin saqtandyrý jarnasyn tóleı bastaıdy. Jańa normalar arqasynda Almatyda 95 myńǵa jýyq adam MÁMS júıesindegi medıtsınalyq kómekke júginýge múmkindik alady.
- Atalǵan sanat ishinen medıtsınalyq kómekti jıi qoldanatyn azamattar iriktelip, jergilikti bıýdjet esebinen saqtandyrylatyn boldy. 2026 jyly 26 myńnan astam adamnyń árqaısysy úshin aı saıyn 9189 teńgeden, jalpy 2,9 mlrd teńgeden astam qarajat jumsalmaq. Sondaı-aq budan bylaı jumyssyz retinde resmı tirkelgender úshin de MÁMS jarnasyn jergilikti atqarý organdary tóleıdi, - dedi Nurdos Qadyrbekov.
Eske salaıyq, buǵan deıin Prezıdent MÁMS týraly zańǵa túzetý engizdi.