Almatyda 2026 jyly magıstraldy kóshelerdi uzartýǵa 8 mlrd teńge bólindi
ALMATY. KAZINFORM – Almatyda qalalyq máslıhattyń kezekten tys XXHIX sessııasy ótti.
Sessııa barysynda ekonomıka jáne qarjy basqarmasynyń basshysy Baýyrjan Qudaıbergenov Almaty qalasynyń 2026-2028 jyldarǵa arnalǵan bıýdjetin tanystyrdy.
Onyń aıtýynsha, 2026 jyly qaladaǵy kólik ınfraqurylymyn damytýǵa 504 mlrd teńge qarastyryldy, bul jalpy bıýdjettiń 20 paıyzyna jýyq. Nátıjesinde salany qarjylandyrý 2025 jylmen salystyrǵanda 1,5 ese artady.
— Úlken Almaty aınalma avtomobıl jolyna shyǵatyn 3 joldy uzartýǵa jáne qala ishindegi 4 magıstraldy kósheni uzartýǵa 8 mlrd teńge qarastyryldy, - dedi Baýyrjan Qudaıbergenov.
Odan bólek vedomstvo basshysy «Qalqaman» metro beketiniń qurylysyn kelesi jyly aıaqtaý úshin 21,2 mlrd teńge bólinetinin atap ótti. Al ózge jol-ınfraqurylym nysandaryna jer telimderin satyp alý úshin 51,7 mlrd teńge jumsalady.
Sondaı-aq bıýdjet qarjysy kelesi jobalarǵa bólinedi:
– Metropolıten jáne áleýmettik mańyzy bar 206 marshrýt boıynsha jolaýshylar tasymalyn sýbsıdııalaýǵa – 107,6 mlrd teńge;
– «Shyǵys» jáne «Batys» qaqpa polıortalyqtarynda joldar salýǵa – 30 mlrd teńge;
– 250 km joldyń, trotýarlardyń, velojolaqtardyń jáne 40 aıaldama alańynyń ortasha jóndeýine – 26 mlrd teńge;
– Raıymbek dańǵyly boıymen BRT jelisin salýǵa – 25 mlrd teńge;
– Aıaldama pavılondarynda 1 888 elektrondy tablo ornatýǵa – 4,9 mlrd teńge;
– «Ajar», «Boraldaı», «Rahat–Mádenıet» shaǵyn aýdandarynda joldar salýǵa – 1,8 mlrd teńge bólinedi.
Almaty máslıhatynyń depýttary qalanyń 2026-2028 jyldarǵa arnalǵan bıýdjet jobasyn qoldap, ony bekitti.
Eske salaıyq, buǵan deıin Almatyda 2026 jyly 250 shaqyrym jol jóndeletinin jazǵanbyz.