Almatyda 2026 jyly qandaı kósheler uzartylady
ALMATY. KAZINFORM — Almatyda 2026 jyly jol-kólik ınfraqurylymyn damytýǵa baǵyttalǵan jumys jalǵasady.
Qalalyq jol ınfraqurylymyn damytý basqarmasynyń málimetinshe, bıyl qala kóshelerin uzartýǵa erekshe nazar aýdarylady. Atap aıtqanda: Saın kóshesin (Rysqulov dańǵylynan Móńke bı kóshesine deıin), Abaı dańǵylyn (qala shekarasynan Úlken Almaty aınalma jolyna deıin), Tóle bı kóshesin (ıAsaýı kóshesinen qala shekarasyna deıin), Tilendıev kóshesin (Rysqulov dańǵylynan qala shekarasyna deıin), Jubanov kóshesin (Momyshuly kóshesinen qala shekarasyna deıin), Raıymbek batyr dańǵylyn (Jetisý kóshesinen Shyǵys aınalma avtokólik jolyna deıin) uzartý boıynsha jumys jalǵasyn tabady.
Sonymen qatar keı kóshelerdiń jańa bóligin salýǵa baǵyttalǵan jobalar bıyl alǵash ret qolǵa alynady. Mysaly, Muqanov kóshesin Raıymbek batyr dańǵylynan Maqataev kóshesine deıin uzartý jumystary jer telimderi ýaqtyly alynǵanyna qaraı osy jyly bastalmaq.
Odan bólek Soltústik aınalma jolyn qala shekarasyna deıin ótkizý jumystaryn bastaý úshin joba memlekettik saraptamaǵa jiberilgen. Hmelnıtskıı kóshesin «Qaırat» yqsham aýdanynan Talǵar tas jolyna deıin uzartý úshin de jobalaý-smetalyq qujattama daıyn. Bul ekeýi boıynsha memlekettik saraptamanyń qorytyndysy 2026 jyldyń naýryz aıynda kelýi tıis.
Qansha jer ýchaskesin alý qajet
Qala kóshelerin uzartý jumystaryn tejeıtin basty sebepterdiń biri — memleket muqtajyna jer ýchaskeleriniń baıaý alynýy. Bul baǵyttaǵy jumys bıyl da jalǵaspaq. Jol ınfraqurylymyn damytý basqarmasy ár joba boıynsha búginge deıin qansha jer telimi alynǵanyn jáne qanshaýy qalǵanyn naqtylady:
— Rysqulov dańǵylyn uzartýǵa 220 ýchaske alynýy qajet. Onyń 198-i satyp alyndy, 22-si jumys barysynda.
— Muqanov kóshesin uzartýǵa qajet 211 ýchaskeniń 124-i satyp alynǵan, 87-si jumys barysynda.
— Tilendıev kóshesin uzartýǵa qajet 467 ýchaskeniń 107 ýchaskesi satyp alyndy, 360 ýchaske boıynsha jumys júrgizilip jatyr.
— Tóle bı kóshesin deıin uzartý úshin 264 ýchaskeni alý qajet edi. Búgingi kúni onyń 252-si satyp alyndy, 12-si jumys barysynda.
— Hmelnıtskıı kóshesin uzartýǵa qajet 97 ýchaskeniń 61-i satyp alyndy, 36 ýchaske boıynsha kelissózder júrgizilip jatyr.
Sondaı-aq Almaty qalasynyń jol ınfraqurylymyn damytý basqarmasy Abaı dańǵylyn qala shekarasynan Úlken Almaty aınalma avtokólik jolyna deıin uzartý úshin ekiaradaǵy ýchaskeni qala teńgerime berý jumystary júrgizilip jatqanyn atap ótti. Sebebi bul aýmaq oblysqa jatady.
— Osy ýaqytqa deıin tek jobalyq-smetalyq qujattama berildi. Oblystyq ýchaske boıynsha shamamen 3,4 km avtojol salý kózdelgen. Barlyǵy 31 jer ýchaskesin memleket muqtajyna alý qajet. Qazir 19 ýchaske satyp alyndy, 12 ýchaske boıynsha jumystar júrgizilip jatyr, — delingen vedomstvo jaýabynda.
Eske salaıyq, buǵan deıin Almatyda 2026 jyly magıstraldy kóshelerdi uzartýǵa 8 mlrd teńge bólinetinin jazǵanbyz.