Almatyda 2026 jyly egiletin aǵash pen buta sany artty
ALMATY. KAZINFORM — Almatyda jasyl jelekti kóbeıtý boıynsha jumystar jaqynda bastalady.
Almaty ákimdiginiń málimetinshe, byltyr megapolıste shamamen 370 myń buta jáne 5 myńnan astam iri kólemdi aǵash otyrǵyzyldy. Al bıyl olardyń sany aıtarlyqtaı kóbeımek.
2026 jylǵy jospar boıynsha 500 000 buta men 7 200 iri aǵash egilýi tıis. Odan bólek kesilgen aǵashtardyń ornyna 40 myń kóshet otyrǵyzý josparlanǵan. Osy kóktemde 7 200 iri aǵashtyń 3 744-i egiledi.
— Kóshetter qalaǵa jetkizildi, qazir daıyndyq jumystary júrip jatyr. Aýa raıy qolaıly bolǵan kezde otyrǵyzý kezeń-kezeńimen bastalady. Sonyń arqasynda Jazda aǵash saıasy kóleńke bolyp, shań-tozań azaıady, kóshe men aýla turǵyndar úshin jaıly bola túsedi, — dep túsindirdi ákimdikten.
Kógaldandyrý jumystary qalanyń negizgi magıstraldy kósheleri men qoǵamdyq keńistikterde júrgiziledi.
Eske salaıyq, Almatyda 2030 jyly ár turǵynǵa 15 sharshy metr jasyl jelek bolady. Osy maqsatta 2026-2030 jyldarǵa arnalǵan jańa 5 jyldyq dendrologııalyq jospar ázirlenip jatyr.