Almatyda 2026-2028 jyldarǵa qorshaǵan ortany qorǵaý jospary bekitildi
ALMATY. KAZINFORM — Almatyda qalalyq máslıhattyń kezekten sessııasy ótti.
Sessııa barysynda Almaty qalasynyń Ekologııa jáne qorshaǵan orta basqarma basshysynyń orynbasary Arshat Bahtygereev 2026-2028 jyldarǵa arnalǵan qorshaǵan ortany qorǵaý jónindegi is-sharalar josparyn usyndy. Ekologııa jáne tabıǵı resýrstar mınıstrligi bekitken qaǵıdalarǵa saı ázirlengen qujat 9 baǵyt boıynsha 43 is-sharany qamtıdy. Onyń ishinde 17 is-shara atmosferalyq aýanyń sapasyn jaqsartýǵa baǵyttalǵan.
— Atmosferalyq aýany qorǵaý baǵyty boıynsha ekinshi jáne úshinshi jylý elektr ortalyqtaryn gazǵa kóshirý, jeke sektordy gazdandyrý, avtokólikterdiń shyǵaryndylaryn baqylaý, shyǵaryndylar deńgeıi tómen aımaqtardy engizý, sondaı-aq Almaty qalasynyń atmosferalyq aýasyn qorǵaý erejelerin iske asyrý sharalary qarastyrylǵan. Sý resýrstary baǵyty boıynsha sý sapasyna monıtorıng júrgizý, ózen arnalary men kanaldardy jańǵyrtý, jalpy uzyndyǵy 120 shaqyrymnan asatyn aryq jelilerin salý men jańǵyrtý sharalary kózdelgen. Jasyl qor bóliginde jasyl jelekterdi túgendeý, qala aýmaǵyn kógaldandyrý, jyl saıyn keminde 320 myń jasyl aǵash otyrǵyzý josparlanǵan, — dedi Arshat Bahtygereev.
Máslıhat depýtattary Almaty qalasynyń qorshaǵan ortany qorǵaý jónindegi 2026-2028 jyldarǵa arnalǵan is-sharalar josparyna qoldaý bildirip, atalǵan qujatty bekitti.
Eske salaıyq, byltyr Almaty máslıhatynda atmosferalyq aýany qorǵaý qaǵıdalaryn bekitilgen bolatyn.
Bul qaǵıdalar jaıly Ekologııa jáne qorshaǵan orta basqarma basshysynyń orynbasary Arshat Bahtygereev agenttikke bergen suhbatynda tolyǵyraq aıtyp berdi.
