Almatyda 2025 jyly qandaı erekshe rekord ornatyldy
ALMATY. KAZINFORM — Bıyl Almaty qalasy men Almaty oblysynda birqatar erekshe rekordtar tirkeldi.
Olardyń biri - áıgili Gınnes rekordtar kitabyna tirkelse, qalǵandary Global Book of Records dúnıejúzilik rekordtar kitaby men Qazaqstan rekordtar kitabyna endi.
Eń uzyn laǵman
2025 jyldyń 1 mamyrynda Qazaqstan halqynyń birligi kúnine oraı Almatyda elimizdegi eń uzyn laǵman jasaldy.
«Aınabulaq» shaǵyn aýdanyndaǵy № 4 mamandandyrylǵan balalar-jasóspirimder sport mektebinde 1704 metr bolatyn laǵman daıyndaldy jáne bul derek Qazaqstannyń Rekordtar kitabynda resmı tirkeldi.
Jalpy 19 keli unnan qamyr ılenip, 50-den astam aspaz taǵamdy eki saǵattyń ishinde daıyndaǵan.
- Aspazdardyń aldynda qamyrdy jyrtyp almaı daıyndaý mindeti turdy. Qıyndyqtarǵa qaramastan bizdiń aspazdar ony óte jaqsy daıyndady, - dedi Jetisý aýdany Analar keńesiniń tóraıymy Rahıma Omarova.
Eń úlken quraq kórpe
Megapolıste tirkelgen erekshe rekordtar qatarynda - bıyl Medeý muz aıdynynda quraq kórpe jınaýǵa arnalǵan is-shara da bar.
Muz aıdyn alańyna quraq kórpeler jaıylyp, bir pishinmen birge jınaldy. Bul kórpeler aldyn ala barlyǵy bir túste, salmaǵy men ólshemi birdeı bir materıaldan jasalǵan. Іs-sharaǵa Qazaqstannyń 20 óńirinen 660 quraqshy kelip qatysty.
Uıymdastyrýshylar málimetinshe, olardyń eń kishisi 6 jasta, eń úlkeni — 90 jasta boldy. Al óńirler boıynsha bastamaǵa qatysqan eń úlken delegatsııa Almaty qalasy (93) men Túrkistan oblysynan (99).
Álemde áıgili 4 dúnıejúzilik rekordtar kitabynyń biri - Global Book of Records ókilderi mádenı is-sharaǵa arnaıy qatysyp, erekshe rekordty resmı túrde tirkedi.
Eń úlken kerýen
Almaty oblysynda da 2025 jyly erekshe rekordtar tirkeldi. Іle aýdanynyń Kúrti aýyldyq okrýginde álemdegi eń úlken túıe kerýeni júrip ótti.
Kerýen quramyna 1 000 túıe engizilip, olar arnaıy daıyndalǵan 1 shaqyrymdyq joldy júrip ótti. Buǵan deıingi álemdik rekord 2022 jyly Qytaıda tirkelgen bolatyn. Ol kezde tek 365 túıe qatysqan edi. Qazaqstan bul jetistikti úsh eseden astam arttyryp, álem nazaryn ózine aýdardy.
Іs-sharaǵa Anglııadan arnaıy kelgen Gınnestiń rekordtar kitabynyń ókili Rıchard Stennıng qatysyp, kerýenniń ár qımylyn qatań baqylap otyrdy. Barlyq talaptar saqtalǵanyna kóz jetkizgen soń, ol jańa rekord resmı túrde tirkelgenin habarlady.
Eske salaıyq, Qazaqstan ne sheteldik rekordtar kitabyna enbese de, Almaty metrosy bıyl ózi úshin jańa rekord ornatty. 30 qyrkúıek, «Qaırat» pen «Real Madrıd» arasyndaǵy oıyn ótken kúni metropolıten 142 932 jolaýshy tasymaldady.