Almatyda 2 000 oryndyq mektep salynyp jatyr
ALMATY. KAZINFORM - Qulja tas jolynyń ońtústiginde, Medeý aýdanyndaǵy «Shyǵys qaqpasy» jańa polıortalyǵynyń aýmaǵynda 2000 oryndyq jańa mektep salynyp jatyr. Almaty ákimi Erbolat Dosaev qurylys alańyna bardy.
Qala ákimi mektepke kireberis joldy jáne turaq keńistigin jaılastyrý kezinde qaýipsizdik sharalaryn qamtamasyz etý qajettigin atap ótti.
Osy maqsatta jyldamdyq rejımin shekteý engiziledi jáne retteletin jaıaý júrginshiler ótkelderi jabdyqtalady.
Sondaı-aq, shahar basshysy nysannyń ınjenerlik jelilerin jalpyqalalyq jelilerge ýaqtyly qosý jáne kórsetilgen merzimde qurylysty aıaqtaý qajettigin atap ótti.
«Samruk-Kazyna Construction» AQ basqarma tóraǵasynyń orynbasary Amangeldi Sattarovtyń aıtýynsha, mektep úsh qabatty bolady, ashana tómengi qabatta, jertólede ornalasady. Aýmaqta úlken stadıon qarastyrylǵan.
Jańa jol qozǵalysy erejesi boıynsha josparlanǵan turaq ornynda jasyl aımaq jabdyqtalady. Avtokólikter úshin bólek turaq bolady. Nysandy jyl sońyna deıin tapsyrý josparda.
Medeý aýdanynyń «Dýman», «Dýman-2», «Atyraý», «Keńsaı» jáne «Alataý» shaǵyn aýdandarynda turatyn balalar jańa mektepke bara alady.
Bul atalǵan shaǵyn aýdandarda ornalasqan qoldanystaǵy úsh — № 98, № 99 jáne№ 64 mektepterdiń júktemesin aıtarlyqtaı tómendetýge múmkindik beredi.
Eske salsaq, Almatyda Memleket basshysynyń bastamasymen «Jaıly mektep» ulttyq jobasy aıasynda 36800 oqýshyǵa arnalǵan 22 mektep salynýda.
Olar iske qosylǵan kezde, 2025 jylǵy 1 qyrkúıektegi jaǵdaı boıynsha oqýshy oryndarynyń tapshylyǵy basqarylatyn deńgeıge deıin 3-4 myń orynǵa deıin tómendeıtin bolady.
Basty mindet — 2030 jylǵa qaraı bir aýysymmen oqytýǵa tolyq kóshý.
Aıta keteıik, Qasym-Jomart Toqaev Almaty qalasyna jasaǵan jumys sapary aıasynda Prometheus school bilim berý uıymyn aralap kórgen bolatyn.
Rrometheus school byltyr 9 qarashada ashylǵan. Mektep 840 oqýshyǵa arnalǵan. Aýmaǵy — 12 myń sharshy metr. Bilim berý mekemesin salý úshin 5,2 mıllıard teńge ınvestıtsııa tartylǵan.
Az qamtylǵan otbasylardyń daryndy balalary úshin bilim granttary bólinedi. Mektep jyl saıyn grant sanyn arttyrýdy josparlap otyr.
Qor dırektory ári mekteptiń baqylaýshylar keńesiniń tóraǵasy Dosym Besbaıdyń aıtýynsha, 1400 oqýshyǵa arnalǵan «FızTeh» mektebin ashý jumystary júrgizilip jatyr.
Bul mektep túlekterdiń álemdegi jetekshi tehnıkalyq joǵary oqý oryndaryna túsýine múmkindik týǵyzý úshin sapaly bilim berýdi kózdeıdi.
Mektep qurylysyn bıyl qarasha aıynda aıaqtaý josparlanǵan.
Jobaǵa tartylǵan ınvestıtsııa kólemi — 3,9 mlrd teńge.
