Almatyda 20 jastaǵy kýrerden 2,5 keli esirtki tárkilendi

ALMATY. KAZINFORM – Almaty qalasynyń Alataý aýdanynda júrgizilgen jedel-izdestirý sharalary nátıjesinde ınternet-dúkenniń bir tarmaǵynyń qyzmeti toqtatyldy. 

Onda 20 jastaǵy jasyryn jetkizýshi jumys istegen. Jeke tintý barysynda narkokýrerden 127 oram mefedron jáne taratýǵa daıyndalǵan 2 myń «ekstazı» tabletkasy, sondaı-aq turǵylyqty jerinen shamamen 1 keli sıntetıkalyq esirtki tárkilendi.

Jalpy salmaǵy 2,5 keli, bul tutynýshyǵa jetpegen 6 myń bir rettik dozaǵa teń. Tólem krıptovalıýta arqyly alynǵan.

Kúdikti ýaqytsha ustaý ızolıatoryna qamaldy.

Atalǵan fakti boıynsha Qylmystyq kodeksiniń 297-baby 3-bóligimen sotqa deıingi tergep-tekserý bastaldy.

Oǵan 12 jylǵa deıin bas bostandyǵynan aıyrý jazasy qarastyrylǵan.

Aıta ketelik Pavlodarda iri esirtki arnasy joıylǵan edi.