Almatyda 20 myńnan astam jastyń basyn qosqan 10 kúndik mereke ótip jatyr
ASTANA. KAZINFORM – Almatyda Halyqaralyq jastar kúnine oraı uıymdastyrylǵan ALMA LOVE 2026 aýqymdy jastar festıvali bastaldy. 2-12 tamyz aralyǵynda ótetin festıval aıasynda bilim berý, mádenıet, sport, ekologııa, volonterlik jáne qoǵamdyq bastamalardy qamtıtyn ondaǵan is-shara uıymdastyrylyp, oǵan 20 myńnan astam jastyń qatysýy kútilýde.
Almaty qalasy Jastar saıasaty basqarmasynyń uıymdastyrýymen ótip jatqan festıval búginde qala jastaryn biriktiretin eń iri alańdardyń birine aınalǵan. Bıylǵy ALMA LOVE «Qala senen bastalady» tujyrymdamasymen ótýde. Bul ıdeıa jastardyń qalanyń damýyna, qoǵamdyq ómirge jáne oń ózgeristerge bastamashy bolatyn negizgi kúsh ekenin aıqyndaıdy.
Almaty qalasy Jastar saıasaty basqarmasynyń basshysy Azız Qajdenbektiń aıtýynsha, festıval memlekettik jastar saıasatynyń negizgi basymdyqtaryna tolyq sáıkes keledi jáne Memleket basshysy aıqyndaǵan qundylyqtardy dáripteýge baǵyttalǵan.
– Festıval tujyrymdamasy memlekettik jastar saıasatynyń negizgi basymdyqtaryna tolyq sáıkes keledi jáne Memleket basshysy aıqyndaǵan qundylyqtardy dáripteıdi. Búginde jastardyń jaýapkershiligin, jasampazdyq mádenıetin jáne qoǵam ómirine belsendi qatysýyn qalyptastyrý asa mańyzdy. ALMA LOVE – bul merekelik alań ǵana emes, jastardyń jańa bilim alyp, óz múmkindigin júzege asyryp, jańa bastamalarǵa jol ashatyn keńistik, – dedi Azız Qajdenbek.
Onyń aıtýynsha, festıval aıasyndaǵy barlyq is-sharalar QR Prezıdentiniń «Adal azamat», «Taza Qazaqstan» jáne «Zań men tártip» jalpyulttyq bastamalaryn qoldaýǵa baǵyttalǵan. Baǵdarlama jastar arasynda qorshaǵan ortaǵa janashyrlyqty, qoǵamdyq qundylyqtardy qurmetteýdi, zańǵa baǵyný mádenıetin jáne el bolashaǵyna degen jeke jaýapkershilikti qalyptastyrýdy kózdeıdi.
Festıvaldiń alǵashqy kúni EcoVibe ekologııalyq chellendjimen bastaldy. Onyń aıasynda júzdegen jas qaladaǵy aýlalar men qoǵamdyq keńistikterdi abattandyrý jumystaryna qatysyp, ekologııalyq aktsııalarǵa atsalysty. Sonymen qatar 3 tamyzdan bastap JasVibe qalalyq jobasy iske qosylyp, brendtelgen avtokólik pen JasAlmaty maskoty Almaty kóshelerinde festıvaldiń merekelik atmosferasyn qalyptastyryp, turǵyndardy baǵdarlamamen tanystyrýda.
Uıymdastyrýshylar festıval baǵdarlamasynda jastardyń zııatkerlik jáne tulǵalyq damýyna erekshe kóńil bólingenin atap ótti. 4 tamyz kúni qalanyń komıýnıtı ortalyqtarynda qarjylyq saýattylyq, ekologııalyq jaýapkershilik, sanaly tutyný jáne azamattyq belsendilik taqyryptaryna arnalǵan LEVEL UP ıntellektýaldyq oıyndary ótedi.
5 tamyz kúni Arbat alańynda Avenue Talent jobasy uıymdastyrylyp, jas ánshiler, mýzykanttar, aqyndar, bıshiler men sýretshiler óz shyǵarmashylyǵyn kópshilik nazaryna usynady.
Festıvaldiń basty oqıǵalarynyń biri – 6 tamyzda ótetin ALMA LOVE Talks jastar forýmy. TED formatynda uıymdastyrylatyn kezdesýlerge kásipkerler, ǵalymdar, sportshylar, qoǵam qaıratkerleri men pikir kóshbasshylary qatysyp, jastarmen tájirıbe bólisedi.
Baǵdarlama aıasynda 7 tamyzda Saıran kóliniń jaǵasynda ashyq aspan astyndaǵy kıno kórsetilimi uıymdastyrylady. 8 tamyzda JasAlmaty Cup – 2026 fýtbol týrnıri ótse, 10 tamyzda Youth Nomads ulttyq oıyndar festıvali jáne «Abaı jaǵalaýda» mádenı-aǵartýshylyq jobasy bastalady. Al 10–11 tamyz kúnderi kóshbasshylyq, ınnovatsııalar, volonterlik, psıhıkalyq densaýlyq jáne halyqaralyq jastar yntymaqtastyǵy taqyryptaryna arnalǵan halyqaralyq UNICEF Jastar forýmy – 2026 uıymdastyrylady.
Festıvaldiń qorytyndysy 12 tamyz kúni «Shabyt» jazǵy amfıteatrynda ótetin ALMA LOVE gala-kontsertimen túıindeledi. Merekelik keshte tanymal qazaqstandyq óner juldyzdary óner kórsetip, belsendi jastar marapattalady. Sonymen qatar kontsertke balalar úıiniń tárbıelenýshileri men qoǵam qaıratkerleri qatysady.
Festıval kúnderi áleýmettik jobalar kórmesi, jastar bastamalary aımaǵy, ıgi isterdiń tsıfrlyq platformasy, kitap keńistigi, sporttyq jáne oıyn alańdary, shyǵarmashylyq sheberlik sabaqtary men Almatyǵa degen súıispenshilikti nasıhattaıtyn zamanaýı art-ınstallıatsııalar jumys isteıdi.
Uıymdastyrýshylardyń aıtýynsha, ALMA LOVE 2026 bilim, mádenıet, sport, shyǵarmashylyq, volonterlik jáne qoǵamdyq bastamalardy toǵystyrǵan Qazaqstandaǵy eń iri jastar festıvalderiniń biri retinde óz mártebesin taǵy bir márte dáleldeıdi. Festıvaldiń negizgi maqsaty – qalanyń damýy árbir jas azamattan bastalatynyn, al Almatyǵa degen súıispenshilik jaýapkershilikpen, jasampazdyqpen jáne ortaq ıgilikke úles qosýdan kórinetinin kórsetý.
