Almatyda 20 myńǵa jýyq adam tumaý jáne JRVI juqtyrǵan
ALMATY. KAZINFORM - Almatyda kóktem kelisimen tumaý juqtyrǵandardyń sany artqan.
Almaty sanıtarııalyq-epıdemıologııalyq baqylaý departamentiniń málimetinshe, ótken aptada JRVI, tumaý aýrýlarynyń 18 515 jaǵdaıy tirkelgen. Bul kórsetkish ótken jyldyń osy kezeńimen salystyrǵanda 7,7 paıyzǵa (16622 jaǵdaı) joǵary. Sondaı-aq resmı derekke sáıkes, tumaý juqtyrǵandardyń 60,5 paıyzy - balalar (11195 jaǵdaı).
- Almaty qalasy boıynsha qazirgi ýaqytta jedel respıratorlyq ınfektsııalardyń baqylaý deńgeıinen aspaıtyn maýsymdyq ósýi baıqalady. Qalada JRVI men tumaýdan bólek rınovırýs, bokavırýs, RS vırýs, adenovırýs, paragrıpp, maýsymdyq koronavırýstar aınalymda júr. Sondyqtan aýrýdyń aldyn alý sharalaryn oryndaýǵa keńes beremiz, - dedi Almaty qalasynyń Bas memlekettik sanıtarııalyq dárigeri Qasymhan Alpysbaıuly.
Eske salaıyq, buǵan deıin SQO-da tumaýǵa jatpaıtyn vırýstardyń jeti túri tarap jatqanyn jazǵanbyz.