Almatyda 2 myńǵa jýyq adamdy kene shaqty, bireýinen entsefalıt tabyldy

ALMATY. KAZINFORM — Almatyda 1927 adamdy kene shaqty. Onyń 911-i bala. Bul týraly qalalyq sanıtarııalyq-epıdemıologııalyq baqylaý departamentinen málim etti.

Departament málimetinshe, kene belsendiligi maýsymy bastalǵannan beri 2024 jyldyń 20 maýsymdaǵy jaǵdaı boıynsha kene shaqqan 1927 adam medıtsınalyq uıymdarǵa júgindi.

Onyń ishinde 14 jasqa deıingi balalardyń úles salmaǵy 47,2 paıyz (911).

Barlyǵyna shuǵyl medıtsınalyq kómek kórsetildi, kórsetkish boıynsha kenege qarsy ımmýnoglobýlın engizildi. 

«Osy jyly eresekter arasynda kene entsefalıtiniń 1 jaǵdaıy tirkeldi», - delingen habarlamada. 

Vedomstvo ókilderi kene shaǵyp alǵan jaǵdaıda múmkindiginshe erterek, kene shaqqannan keıin 4 kúnnen keshiktirmeı medıtsınalyq mekemelerdiń kómegine júginý kerektigin eskertti. 

Sondaı-aq Almaty qalasynda orman alqaptaryn, halyqtyń jappaı demalatyn jerlerin – saıabaqtardy, skverlerdi kenege qarsy óńdeý júrgizildi.

14 mamyr men 11 maýsym aralyǵynda barlyǵy 2000 gektardan astam aýmaq óńdeldi.