Almatyda 2 kúnde masań kúıde kólik basqarǵan 30 júrgizýshi ustaldy

ALMATY. KAZINFORM – Almatyda demalys kúnderi jol qozǵalysy erejelerin óreskel buzý faktilerin anyqtaýǵa baǵyttalǵan keń aýqymdy reıd uıymdastyryldy.

Almaty qalasy Polıtsııa departamentiniń málimetinshe, senbi-jeksenbi kúnderi mas kúıinde kólik basqarǵan 27 júrgizýshi ustalǵan. Sot olardyń árqaısysyna qatysty ákimshilik jaza taǵaıyndap, keminde 15 táýlikke qamaýǵa alý jáne 7 jylǵa kólik basqarý quqyǵynan aıyrý týraly sheshim shyǵardy.

- Tájirıbe kórsetkendeı, esirtki nemese alkogol qoldanǵan júrgizýshiler áli de kezdesedi. Mundaı jaǵdaılarda jıi kezdesetin stsenarıı: bir top adam birge ishimdik ishedi, sodan júrgizýshi aşy sý urttaǵanyna qaramastan úıine kólikpen qaıtady. Ol ózine tym senimdi bolyp, esh qıyndyqsyz jete alatynyna senedi. Alaıda ókinishke qaraı, mundaı jaǵdaılar kóbinese jol apatymen aıaqtalyp jatady, – dedi Almaty qalasy PD jergilikti polıtsııa qyzmeti basqarmasynyń basshysy Serik Shýmaev.

Demalys kúnderi jol qozǵalys erejelerin óreskel buzýdyń ózge de derekteri anyqtaldy. Atap aıtqanda, júrgizý quqyǵy joq adamnyń kólik júrgizýi - 1, qarama-qarsy qozǵalys jolaǵyna shyǵý - 16, manevr jasaý erejesin buzý - 20, apattyq jaǵdaı týyndatý - 10, kólikti turaqqa qoıý erejesin buzý - 20, memlekettik tirkeý nómiri joq kólik quralyn basqarý - 2.

Eske salaıyq, buǵan deıin Almatyda jol apatynan jaıaý júrginshi mert bolǵanyn jazǵanbyz.