Almatyda 1,9 trln teńge ınvestıtsııa tartylyp, ekonomıka 6,4%-ǵa ulǵaıdy
ALMATY. KAZINFORM — Almaty ákimi Darhan Satybaldy Ortalyq kommýnıkatsııalar qyzmeti alańynda ótken brıfıng kezinde 2025 jyly qańtar-qarasha aılaryndaǵy megapolıstiń áleýmettik-ekonomıkalyq damýynyń negizgi kórsetkishterin tanystyrdy.
Ákimniń aıtýynsha, qalanyń basty basymdyǵy — uzaq merzimdi damýdyń negizi sanalatyn ekonomıkanyń turaqty ósimin qamtamasyz etý.
— Bıyl Almatyda iskerlik belsendilik joǵary deńgeıde saqtalyp, ınvestıtsııalyq serpin oń baǵytta damydy. 11 aıdyń qorytyndysy boıynsha qysqa merzimdi ekonomıkalyq ındıkator 11,4% bolyp, byltyrǵy osy kezeńindegi kórsetkishten asyp tústi. Ekonomıkalyq ósimniń negizgi draıverleri — qurylys (38,3%), kólik salasy (21,5%) jáne óńdeý ónerkásibi (16,8%), — dedi Almaty ákimi.
Darhan Satybaldynyń sózinshe, ekonomıkalyq ósim joǵary ınvestıtsııalyq belsendilikpen nyǵaıa túsip otyr. 2025 jyldyń qańtar-qarasha aılarynda qalanyń negizgi kapıtalyna 1,9 trln teńge ınvestıtsııa tartyldy. Bul byltyrǵy osy kezeńmen salystyrǵanda 19% kóp.
Jyl ishinde jalpy quny shamamen 500 mlrd teńge bolatyn 12 iri ınvestıtsııalyq joba iske qosyldy. Olardyń qatarynda Haval, Chery jáne Changan markaly jeńil avtokólikter shyǵaratyn mýltıbrendti zaýyt, avtokólik shınalaryn rezeńke úgindisine qaıta óńdeý zaýyty, shyny ydys óndiretin kásiporyn, sondaı-aq kún modýlderin shyǵarý jobalary bar.
Jyl qorytyndysy boıynsha Almatynyń jalpy óńirlik óniminiń ósimi 6,4% deńgeıinde bolmaq. Ekonomıkanyń damýy salyq túsimderiniń turaqty artýymen qatar júrip jatyr: 2025 jyly 11 aıda jergilikti bıýdjetke 1 trln 970 mlrd teńge tústi. Bul kórsetkish ótken jyldyń osy kezeńimen salystyrǵanda 19,4%-ǵa joǵary.
— Qala turǵyndarynyń ál-aýqatyn arttyrý máselesine aıryqsha kóńil bólinip otyr. 2025 jyly Almatyda 92 myń jumys orny quryldy, onyń 87%-y — turaqty. Toǵyz aıdyń qorytyndysy boıynsha qaladaǵy ortasha aılyq jalaqy 539 myń teńge bolyp, nomınaldy mánde 14,5%-ǵa ósti jáne respýblıkalyq ortasha deńgeıden 29%-ǵa joǵary boldy, — dedi Almaty ákimi Darhan Satybaldy.
Eske salaıyq, buǵan deıin Almatynyń bıýdjet kiristeri bıyl alǵash ret 2,3 trln teńgeden asatynyn habarlaǵanbyz.