Almatyda 19–24 qazan aralyǵynda jaryq óshýi múmkin
ALMATY. KAZINFORM - 19–24 qazan aralyǵynda Almatynyń birqatar kóshesinde elektr jelilerine jóndeý júrgiziledi. Osy kezeńde jaryq óshýi múmkin.
«Alataý Jaryq Kompanııasy» málimdeýinshe, jóndeý jumystary negizinen saǵat 08:00 nemese 09:00-den 17:00-ge deıin júrgiziledi. Tizimge qalanyń ondaǵan kóshesi men birneshe shaǵynaýdany engen.
19 qazanda Abaqan, Baıanaýyl, Jangeldın, Mýsorgskıı, Natarov, Núsipbekov, Potanın, Seıfýllın, Áıteke bı, Gogol, Isaev, Abaı, Jeltoqsan, Qurmanǵazy, Tóle bı jáne basqa da kóshelerdiń jekelegen ýchaskelerinde jóndeý josparlanǵan. Sondaı-aq Shańyraq-1, Qalqaman-2, Alǵabas, Aqjar jáne Shuǵyla shaǵynaýdandary da bar.
20–23 qazan aralyǵynda Rycqulov, Abaı, Gagarın jáne Raıymbek dańǵyldarynyń, sondaı-aq Jandosov, Turǵyt Ózal, Sátbaev, Túrkebaev, Brýsılovskıı, Tilendıev, Shevchenko, Muqanov, Rozybakıev, Bógenbaı batyr, Abylaı han jáne basqa da kóshelerdiń jekelegen ýchaskelerinde jóndeý júrgizilmek.
24 qazanda Raıymbek dańǵylynyń bir ýchaskesinde jumystar atqarylady.
Kompanııa ókilderi bul atalǵan kóshelerde mindetti túrde jaryq óshiriledi degendi bildirmeıtinin atap ótti. Elektr qýaty tek erekshe jaǵdaılarda, jóndeý kezinde tutynýshylardy basqa elektr kózine aýystyrý múmkin bolmaǵan jaǵdaıda qysqa ýaqytqa ajyratylady.
- Josparly jumystar elektr sapasyn arttyrý maqsatynda júrgiziledi. Olardyń qatarynda aqaýlardy joıý, symdarǵa túsken bógde zattardy tazartý, elektr jelileriniń jekelegen elementterin aýystyrý jáne basqa da jóndeý jumystary bar, - delingen habarlamada.
Kompanııanyń túsindirýinshe, brıgadalar qajetti jumystardy, ádette, 1,5–2 saǵat ishinde oryndaıdy. Degenmen jarııalanǵan kestede keıbir ýchaskeler úshin jumystardyń jalpy ýaqyty saǵat 08:00-den 17:00-ge deıin nemese 09:00-den 17:00-ge deıin dep kórsetilgen.
Eske salsaq, Almatyda 12-16 qazan aralyǵynda jaryq ýaqytsha óshiriletini eskertildi.
