Almatyda №19 baǵytta jańa elektr avtobýstary jolǵa shyǵady
ALMATY. KAZINFORM — Almatyda 22 maýsymnan bastap taǵy bir baǵytta jańa elektr avtobýstary júredi.
Almaty qalasynyń mobıldilik basqarmasynan málim etkendeı, megapolıste qoǵamdyq kólik júıesin damytý jáne ekologııalyq ahýaldy jaqsartý aıasynda qala avtobýstary jańartylyp jatyr. «City Bus» jekemenshik avtoparki «Skywell» markaly elektr avtobýstaryn satyp aldy.
— Jolaýshylar tasymaldaýǵa arnalǵan bul tómen edendi, keń syıymdylyqty elektr avtobýstar bir qýatpen 400 shaqyrymǵa deıin júre alady. Olar dybyssyz qozǵalady, beınebaqylaý kameralary, aýa baptaǵysh, USB-qýattaǵysh porttary, júrgizýshini baqylaý júıesi jáne ózge de zamanaýı júıelermen jabdyqtalǵan, - dep habarlady basqarmadan.
Jańa avtobýstar 2025 jyly 22 maýsymnan bastap №19 baǵyt boıynsha, ıaǵnı «Nurkent turǵyn úı kesheni – Almaty kóshesi» aralyǵynda jolaýshy tasymaldaı bastaıdy. Sonymen qatar bul baǵyttaǵy jolǵa shyǵatyn avtobýstar sany 16-dan 18-ge deıin arttyrylmaq.
Aıta keteıik, bıyl ákimdik gazben júretin qosymsha 600 avtobýs satyp alýdy josparlap otyr.
Budan bólek, jeke tasymaldaýshylar tarapynan 800 gazben júretin avtobýs jáne 118 elektrobýs satyp alý kózdelgen.
Osyǵan deıin №101 baǵytty ekige bólý arqyly jańa avtobýs marshrýty uıymdastyrlǵany týraly jazǵanbyz.