Almatyda 18 jastaǵy jigitti bir top er adam soqqyǵa jyqty
ALMATY. KAZINFORM – Almatyda jas jigitti bir top adam uryp-soqqan. Oqıǵa 12 qazanǵa qaraǵan túni Tóle bı kóshesindegi dámhananyń aldynda bolǵan.
Bul týraly zardap shekken balanyń anasy áleýmettik jelide jazdy.
Onyń aıtýynsha, ulyn shamamen 15-20 er adam uryp ketken. Qazir ol aýrýhanada jatyr. Kúdiktiler esinen tanyp qalǵan balasynyń basynan da tepken.
Qalalyq polıtsııa departamentiniń málimetinshe, Almaly aýdandyq polıtsııa basqarmasy Qylmystyq kodekstiń 107-baby («Densaýlyqqa qasaqana zııan keltirý») boıynsha is qozǵaǵan.
– Júrgizilgen jedel is-sharalardyń nátıjesinde oqıǵaǵa qatysqan barlyq adam anyqtalyp, ustaldy. Árqaısynyń kinásin jáne oqıǵanyń naqty mán-jaıyn anyqtaýǵa baǵyttalǵan tergeý áreketteri júrgizilip jatyr. Barlyq kináli tulǵa zańǵa sáıkes jaýapqa tartylady, - dep habarlady vedomstvonyń baspasóz qyzmeti.
Іstiń tergeý barysy Almaty polıtsııa departamenti basshylyǵynyń erekshe baqylaýynda.
Eske salaıyq, buǵan deıin Jambyl oblysynda fýtbol matchynan keıin jeńilgenin moıyndamaǵan joǵary synyptyń úsh oqýshysy dúken artynda kishi synyp oqýshylaryn jınap, olardy aıaýsyz soqqyǵa jyqqanyn habarlaǵanbyz.
Zardap shekken 2010 jyly týǵan bala jedel járdem kelgenshe kóz jumdy.