Almatyda 17 myńǵa jýyq qyzǵa papılloma vırýsyna qarsy ekpe salynady

ALMATY. KAZINFORM — Almaty adam papılloma vırýsyna qarsy 11 jastaǵy qyzdardy vaktsınalaýǵa daıyn. APV-ǵa qarsy vaktsınatsııa protsesi qalaı uıymdastyrylatynyn óńirlik kommýnıkatsııalar qyzmetiniń brıfınginde sanıtarlyq-epıdemıologııalyq baqylaý departamenti basshysynyń orynbasary Ásel Qalyqova aıtyp berdi.

«Vaktsınatsııa alty aı aralyqpen eki dozany alýdy kózdeıdi. Uıymdastyrylǵan ujymda biz tıisti kontıngentti barynsha qamtýdy qamtamasyz ete alamyz. Mektepterdiń medıtsınalyq qyzmetkerleri jazǵy demalys bastalǵanǵa deıin vaktsınatsııa tehnıkasy boıynsha daıyndaldy. Qajet bolǵan jaǵdaıda mektepke barý úshin qosymsha brıgada qurylady. Mektepterdiń egý kabınetterinde vaktsınatsııa júrgizý úshin jaǵdaılar jasalǵan», — dedi ol.

Epıdemıologtyń aıtýynsha, vaktsınatsııa ata-analardyń tek jazbasha kelisimimen júzege asyrylady. Protsedýradan buryn ár balany qarsy kórsetkishterdi anyqtaý úshin dáriger tekseredi. 

Vaktsına salynǵanan keıin qyzdardy medıtsınalyq qyzmetkerler 30 mınýt boıy baqylaıdy. Sonymen qatar, vaktsınatsııalaýǵa tek tájirıbeli medıtsına qyzmetkerleri ǵana jiberiledi.

«Almatyda 11 jasar qyzdardyń sany 17 myńǵa jýyq ekeni aldyn ala anyqtalǵan, alaıda bul kórsetkish ózgerýi múmkin. Qazirgi ýaqytta Almatyǵa vaktsına jetkiziledi dep kútilýde», — dep atap ótti Ásel Qalyqova.