Almatyda 164 bıznes-jobaǵa 1,73 mln teńgege deıin grant berildi
ASTANA. KAZINFORM – Almatyda bıznes bastaý jáne damytýǵa arnalǵan memlekettik granttar konkýrsynyń alǵashqy kezeńi qorytyndylanyp, 164 bıznes-ıdeıa qoldaý tapty, dep habarlaıdy qala ákimdigi.
Komıssııa qaraýyna barlyǵy 377 ótinim túsip, onyń 164-i maquldanǵan.
– Grant kólemi 1,73 mln teńgege deıin. Qoldaý tapqan jobalardyń qatarynda azyq-túlik jáne kıim óndirisi, qoǵamdyq tamaqtaný, avtoservıs, sulýlyq ındýstrııasy, bilim berý, IT, qurylys jáne basqa da baǵyttar bar, – delingen habarlamada.
Grant ıegerleriniń basym bóligi – kópbalaly otbasylardyń ókilderi. Sonymen qatar memlekettik qoldaýǵa ataýly áleýmettik kómek alýshylar, asyraýshysynan aıyrylǵan otbasylar jáne basqa da sanattaǵy azamattar ıe boldy.
– Komıssııa sheshimin qatysýshylar business.enbek.kz portalyndaǵy jeke kabınetinen kóre alady, – dep habarlady ákimdik.
Qosymsha aqparatty Almaty qalasynyń Eńbek mobıldiligi ortalyǵynan alýǵa bolady. Ortalyq Dostyq dańǵyly, 85 mekenjaıynyń 2-qabatynda ornalasqan.
Aıta keteıik, elimizde jarty jylda shaǵyn jáne orta bıznes sýbektileriniń sany shamamen 550 myńǵa artty.
