Almatyda 16 qabatty turǵyn úıden órt shyǵyp, 127 adam qutqaryldy
ASTANA. KAZINFORM — Almaty qalasy Bostandyq aýdany Abaı dańǵyly boıyndaǵy 16 qabatty turǵyn úıdiń 9-qabatynda ornalasqan páterde jıhaz órtendi, dep habarlaıdy TJM baspasóz qyzmeti.
Vedomstvo málimetinshe, oqıǵa ornyna qutqarýshylar shaqyrtýdyń joǵary dárejesi boıynsha jiberildi.
— Alǵashqy órt sóndirý bólimsheleri kelgen kezde kireberisti qoıý tútin basqany anyqtaldy. TJM qyzmetkerleri turǵyndardy dereý evakýatsııalaýǵa kiristi, — deıdi tótenshe jaǵdaı qyzmetkerleri.
Mınıstrlik atap ótkendeı, oqıǵa ornynda órt sóndirý jedel shtaby quryldy. Gaz-tútinnen qorǵaý qyzmetiniń býyndary turǵyndardy qutqarý jáne evakýatsııalaý jumystaryna jiberildi. Sonymen qatar jumystardy júrgizý úshin órt sóndirý avtosatysy ornatyldy.
— Jedel qabyldanǵan sharalardyń nátıjesinde tútin basqan aımaqtan baspaldaq marshy arqyly 42 adam evakýatsııalandy, al qutqarý qalpaqtarynyń kómegimen 85 adam, onyń ishinde 4 bala qutqaryldy. Órt jedel túrde sóndirildi. Zardap shekkender týraly 112 aqparat túsken joq, — deıdi olar.
Osyǵan deıin Almatyda kabeldik shahtadaǵy órtke baılanysty jedel shtab qurylǵanyn jazdyq.
