Almatyda 1500-ge jýyq áke alıment tóleýden jaltaryp júr
ALMATY. KAZINFORM – Byltyr megapolıste sot oryndaýshylary alıment óndirý boıynsha 22 415 atqarýshylyq is júrgizdi. Onyń ishinde ata-analyq mindetin oryndamaǵany úshin 159 boryshker ákimshilik jaýapqa tartyldy. Bul týraly óńirlik kommýnıkatsııalar qyzmetinde ótken brıfıngte qalalyq Ádilet departamentiniń basshysy aıtty.
Departament basshysy Balaıym Kesebaevanyń sózinshe, alıment boıynsha boryshkerler balalaryn asyraýdan bas tartyp, naqty qarjylyq múmkindikteri bolsa da, tabystary men múlkin jasyrady.
«Іshki ister organdaryna boryshkerlerdi qylmystyq jaýapkershilikke tartý týraly 133 usynys joldandy. Sonymen qatar, boryshkerlerge qaryzdaryna baılanysty elden shyǵýǵa 1328 ýaqytsha tyıym salyndy», - dedi spıker.
Sondaı-aq departamentte jumyssyz boryshkerlerdi jumysqa ornalastyrý jáne kámeletke tolmaǵan balalardyń paıdasyna alıment óndirip alý boıynsha sharalar qabyldanýda.
«Boryshkerdiń turaqty tabysy nemese múlki bolmaǵan jaǵdaıda, alımentti óndirip ala almaıdy. Sondyqtan jeke sot oryndaýshylar, ádilet organdary jergilikti jumyspen qamtý ortalyqtarymen birge boryshkerlerdi jumysqa turǵyzý úshin is-sharalar ótkizedi. Bıyl 8 jármeńke ótkizilip, 780 boryshker jumysqa ornalasqan», – dedi Ádilet departamentiniń basshysy Balaıym Kesebaeva.
Almatyda áleýmettik mańyzy bar sanattaǵy ister boıynsha barlyǵy 23 615 atqarýshylyq is júrgizildi, alımentten basqa, bul jalaqy, zeınetaqy jáne járdemaqy óndirip alý.
«2023 jyly departament 230 boryshkerge qatysty ákimshilik quqyq buzýshylyq týraly hattama toltyrdy, 68 adamǵa ákimshilik qamaýǵa alý sharasy qoldanyldy. Boryshkerlerdi qylmystyq jaýapkershilikke tartý týraly 137 usynys joldandy»,- dep atap ótti spıker.
