Almatyda 150 sýburqaqtyń qanshasy jumys istep tur
ALMATY. KAZINFORM — Almatyda kóp jyldan beri jóndelmegen 4 qalalyq sýburqaq jańǵyrtylyp jatyr.
Kazinform saýalyna jaýap bergen Qoǵamdyq keńistikterdi damytý basqarmasynyń málimetinshe, megapolıste 150 sýburqaq bar, onyń 66-sy kommýnaldyq menshikte jáne olardy qalalyq qyzmetter kútip ustaıdy. Búgingi kúni 66 kommýnaldyq sýburqaqtyń 56-sy qalypty rejımde jumys istep tur. Taǵy úsheýi — Áýezov atyndaǵy skverdegi sýburqaq, sondaı-aq «Qyzǵaldaq» jáne «Baq-baq» sýburqaqtary jaqyn kúnderi iske qosylmaq.
Al irgeles nysandardaǵy qurylys jumystaryna baılanysty Ál-Farabı atyndaǵy Qazaq ulttyq ýnıversıteti men Natalıa Sats atyndaǵy jasóspirimder teatry aldyndaǵy sýburqaqtar qosylmaǵan. Odan bólek tórt qalalyq sýburqaqta bıyl qurylys-montajdaý jumystary júrgizilip jatyr. Olar:
• Qala ákimdigi ǵımaratynyń shyǵys jaǵyndaǵy sýburqaq;
• Qala ákimdigi ǵımaratynyń batys jaǵyndaǵy sýburqaq;
• Respýblıka alańyndaǵy sýburqaq;
• Ǵ.Músirepov atyndaǵy Qazaq Memlekettik Akademııalyq balalar men jasóspirimder teatry aldyndaǵy sýburqaq.
Buǵan deıin 15 jylda alǵash ret jóndeleıin dep jatqan sýburqaqtarǵa 5,6 mlrd teńge jumsalatanyn jazǵanbyz.
Modernızatsııa aıasynda sýburqaqtardyń qurylymdaryn kúsheıtý, ınjenerlik kommýnıkatsııany, sý jabdyqtaýdy, gıdrooqshaýlaýshy qabatty tolyq aýystyrý, nasos stantsııalarymen jáne sý súzý júıelerin jańartý, avtomattandyrylǵan basqarýdy engizý, sondaı-aq jaqyn aýmaqtardy kórkeıtý josparlanǵan.
Taǵy bir mańyzdy jumystardyń biri — qala turǵyndarynyń qaýipsizdigin qamtamasyz etý úshin sýburqaq keshenderinde elektr toǵynyń qaýpin boldyrmaıtyn tómen voltty shamdar men qurǵaq sorǵy jabdyqtary ornatylady.
Qoǵamdyq keńistikterdi damytý basqarmasy eskirgen sýburqaqtardy jańǵyrtý jumystary qandaı satyda ekenin atap ótti.
— Búgingi tańda eski konstrýktsııalardy buzý jumystary aıaqtaldy jáne nysan negizin betondaý júrgizildi. Qazir gıdrooqshaýlaýǵa daıyndyq jumystary júrip jatyr. Barlyq jumys bekitilgen óndiristik kestege sáıkes oryndalyp jatyr, — delingen resmı jaýapta.
2025 jyly basqarma qalanyń sýburqaq sharýashylyǵyn tehnıkalyq qyzmet kórsetý jáne kútip ustaý boıynsha memlekettik satyp alý rásimin ótkizgen.
— Ashyq baıqaý qorytyndysy boıynsha jeńimpaz retinde «Professional group — KZ» JShS anyqtaldy. Qazirgi tańda bul mekeme kommýnaldyq sýburqaqtarǵa kelisimshart negizinde qyzmet kórsetip jatyr, — dep habarlady vedomstvo.
Eske salaıyq, Almatydaǵy sýburqaqtar 1 mamyrda iske qosyldy.