Almatyda 15 sáýirden bastap jylý berý toqtatylady
ALMATY. KAZINFORM - Almaty ákimi Erbolat Dosaevtyń tóraǵalyǵymen qalada jylytý maýsymynyń aıaqtalýy, sondaı-aq aldaǵy 2024-2025 jyldardaǵy jylytý maýsymyna daıyndyqty bastaý máselesine arnalǵan jumys keńesi ótti.
Osy ýaqyttaǵy jaǵdaı týraly Energetıka jáne sýmen jabdyqtaý basqarmasynyń, «Almaty jylý jelileri», «Almatyteplokommýnenergo», «Almaty elektr stantsııalary», «Alataý Jaryq Kompanııasy», «Almaty Sý», Almaty fılıaly «QazTransGaz Aımaqtyń» Almaty fılıaly basshylarynyń baıandamalary tyńdaldy.
Energetıka jáne sýmen jabdyqtaý basqarmasynyń basshysy Talǵat Malybaevtyń aqparaty boıynsha Almaty qalasynda belgilengen syrtqy aýanyń ortasha táýliktik temperatýrasynyń +8⁰ jáne odan joǵary bolýyna baılanysty jylytý maýsymyn daıyndaý jáne ótkizý qaǵıdalaryna sáıkes, gıdrometeorologııalyq qyzmet kúntizbelik bes kún ishinde tirkegen, sondyqtan 2023-2024 jyldyń jylytý maýsymyn aıaqtaý týraly sheshim qabyldandy.
«Jylýdy óshirý 15 sáýirden bastalady ári kelesi tártippen kezeń-kezeńimen óshiriledi: aldymen ákimshilik ǵımarattar, oqý oryndary, mádenıet nysandary jáne basqalar, keıin turǵyn úıler (turǵyn úıler, jataqhanalar, qonaq úıler) jáne áleýmettik nysandar (balalar, emdeý, mektep mekemeleri, kásiptik mektepter, medıtsınalyq-áleýmettik mekemeler)», - dep habarlady ákimdiktiń baspasóz qyzmeti.
Keńeste ınfraqurylymnyń tozýyn azaıtý jónindegi ınvestıtsııalyq baǵdarlamanyń mańyzdylyǵy atap ótildi. 2023 jyly jylý jelileriniń tozýy josparlanǵan 0,6% ornyna 1,3% - ǵa qysqardy.
«Máselen, bıylǵy jyldyń basynda 25 jyldan astam ýaqyt boıy paıdalanylyp kele jatqan tozǵan jelilerdiń uzyndyǵy jelilerdiń barlyq uzyndyǵynyń 802,6 km nemese 57,9% quraıdy. Bıylǵy jyly 20 shaqyrym jylý jelileri qaıta jańartylady, bul tozýdy 1,8% - ǵa tómendetýge múmkindik beredi», - delinedi ákimdiktiń habarlamasynda.
2023 jyly jylytý maýsymyna daıyndyq aıasynda Almaty qalasynyń tabıǵı monopolııalar sýbektileriniń ınvestıtsııalyq baǵdarlamasy boıynsha («AlTS» JShS, «Almaty Sý» MKK, «ATES» JShS) jáne jergilikti bıýdjet esebinen 30 mlrd teńge ıgerildi. Bıylǵy 2024-2025 jylǵy jylytý maýsymyna daıyndyqqa 35 mlrd teńge bólindi, 2025 jyly qosymsha 32 mlrd teńge bólý josparlanýda.
Almaty ákimi aldaǵy jylytý maýsymyna daıyndyq kezinde osy baǵyttaǵy jumystardy kúsheıtýdi, sondaı – aq kommýnaldyq qyzmetterdiń, eki basqarmaǵa, atap aıtqanda, Energetıka jáne sýmen jabdyqtaý basqarmasy men Qalalyq mobıldilik basqarmasynyń joldardy jóndeýmen baılanysty jumystardy júrgizý reglamentterin sınhrondaýdy tapsyrdy.
Aıta keteıik, Almatyda barlyǵy 214 mektep, 190 balabaqsha, 128 aýrýhana jáne 8836 kóppáterli turǵyn úı ortalyq jylytýǵa qosylǵan.
Eske salaıyq, Almatyda jylytý maýsymy ótken jyly 10 qazanda bastalǵan edi.
Sondaı-aq Almaty ákimdigine qalada jylytý maýsymy qandaı jaǵdaıda aıaqtalatynyn habarlaǵan bolatyn.
