Almatyda 15 santımetrden astam qar jaýdy
ALMATY. KAZINFORM – Qalada qar 16 qańtarda tańerteń bastalyp, «Qazgıdromet» RMK boljamynsha, birde toqtap, birde jaýyp 18 qańtar kúni tańǵa deıin jalǵasady.
17 qańtar saǵat 08:00-degi jaǵdaı boıynsha qalaǵa 15 santımetrden astam qar tústi.
Meteorologııalyq stantsııalardyń dereginshe, qar jamylǵysynyń bıiktigi tómendegideı:
• Avıatsııalyq meteostantsııa «Áýejaıda» – 11 santımetr;
• «Kamensk ústirti» meteostantsııasynda – 38 santımetr;
• «Shymbulaq» meteostantsııasynda – 49 santımetr.
– Kommýnaldyq qyzmet qar jaýa bastaǵan sátten bastap kúsheıtilgen táýlik boıy jumys rejımine kóshken. Jumystarǵa 2,8 myńnan astam jol salasy jumysshysy jáne 1 250 birlik arnaıy tehnıka jumyldyrylǵan. Qozǵalys qaýipsizdigin qamtamasyz etý úshin 75 jedel brıgada jumys istep, yldı, dóń jáne jolaıyryqtarǵa kóktaıǵaqqa qarsy qospa sebildi, - dep habarlady Almaty kommýnaldyq ınfraqurylym jáne turǵyn úı ınspektsııasy basqarmasynyń ókilderi.
Qar bastalǵanǵa deıin jolǵa aldyn ala kóktaıǵaqqa qarsy reagentter jáne arnaıy qospalar sebildi. Bul qar qalyń jaǵdaıda da muz qatpaı, kóliktiń tepe-teńdigin saqtaýǵa múmkindik berdi. Keıbir ýchaskede qardyń jınalýy uzaqqa sozylǵan jaýyn-shashyn men temperatýranyń aýytqýyna baılanysty, sonyń saldarynan qardyń erip-qatý úderisi júrgen.
– Shaǵyn kólemdi arnaıy tehnıka trotýarlar men qoǵamdyq keńistikterdi tehnıka kómegimen tazartyp, al qoǵamdyq kólik aıaldamalary, jerústi ótkelderi, baspaldaqtar men pandýstar qolmen tazalanyp jatyr. Túngi ýaqytta eki kezeńmen qar syryp tazalaý júrgizilip, jappaı qar shyǵarý uıymdastyryldy. Qalanyń negizgi magıstraldary men qoǵamdyq aýmaqtarynan 3 myń tekshe metrden astam qar shyǵaryldy, - delingen habarlamada.
Eske salaıyq, buǵan deıin Almatyda 13 saǵat boıy toqtaýsyz qar jaýǵanyn habarlaǵanbyz.
2026 jylǵy 16 qańtarda Almatyda aýa raıyna baılanysty keptelis 10 balǵa jetti.
Sondaı-aq Almaty halyqaralyq áýejaıynda birneshe reıs keshikti.