Almatyda 1,5 mlrd teńgege salynǵan krematorıı nege jumys istemeı tur
ALMATY. KAZINFORM – Almatyda bıýdjetten 1,5 mlrd teńge jumsap salynǵan krematorıı Densaýlyq saqtaý mınıstrligine kerek bolmaı qaldy. Bul týraly Májilis depýtaty Sergeı Ponomarev Instagram-daǵy paraqshasynda aıtty.
Depýtattyń aıtýynsha, 2021 jyly salynǵan krematorıı áli kúnge deıin iske qosylmaı tur.
– Sebep – áli kúnge deıin krematorııdi qaraýyna alatyn uıym anyqtalmaǵan. Sondaı-aq onyń Densaýlyq saqtaý mınıstrligine qajet bolmaı qalǵany belgili boldy. Jerleý qyzmetteri bıýrosymen kelissózder júrgizilip jatyr, – dedi Sergeı Ponomarev.
Depýtat krematorıı úlken qala úshin mańyzdy nysan ekenin tilge tıek etti. Munda Chehııada jasalǵan gazben isteıtin eki pesh bar. Barlyq ınjenerlik jeli tartylǵan.
– Mundaı krematorıı qajet, óıtkeni bıologııalyq jáne medıtsınalyq qaldyqtar óte kóp. Kún saıyn munda 16 máıitti krematsııalaýǵa bolady. Pandemııa, epıdemııa kezinde mundaı nysan óte qajet bolady. Almaty halqynyń sany shamamen 10-15 jyldan keıin 7,5 mln adamǵa jetetinin eskerý qajet, – dedi ol.
Buǵan deıin Almaty ákimdigi krematorıı qurylysyn júrgizgen merdigerdi sotqa bergen bolatyn.
Eske salaıyq, 2020 jyldyń jazynda krematorıı qurylysynyń jobalyq-smetalyq qujattaryn jasaýǵa tender jarııalanǵan bolatyn.