Almatyda 15 myń turǵynnyń jerin zańsyz satqan eks-tóraǵa 5 jylǵa sottaldy
ASTANA. KAZINFORM — Almatyda Aqsaı-1A yqsham aýdany turǵyndarynyń ortaq menshigindegi jer ýchaskelerin zańsyz satqan PIK-tiń burynǵy tóraǵasyna úkim shyqty. Ol bes jylǵa bas bostandyǵynan aıyryldy.
Almaty prokýratýrasy yqsham aýdandaǵy áleýmettik shıelenistiń sebepterin taldaý nátıjesinde sotqa deıingi tergeýdi bastaǵan.
Tergeý barysynda «Shkolnık» PIK-iniń burynǵy tóraǵasy turǵyndardyń ortaq úlestik menshigindegi jer ýchaskelerin zańsyz satqanyn anyqtalǵan.
2026 jylǵy 17 tamyzda ol Qazaqstan Respýblıkasy Qylmystyq kodeksiniń 190-baby 4-bóliginiń 2) tarmaǵy boıynsha kináli dep tanylyp, bes jylǵa bas bostandyǵynan aıyryldy. Úkim zańdy kúshine endi.
Osyndaı zańbuzýshylyqtardyń aldyn alý jáne jaýaptylyqtyń bultartpastyǵyn kórsetý maqsatynda prokýratýra istiń ashyq sot otyrysynda qaralýyn qamtamasyz etti. Sot otyrysyna problemalyq MIB jáne PIK tóraǵalary qatysty.
Prokýratýranyń málimetinshe, qabyldanǵan sharalardyń nátıjesinde Aqsaı-1A yqsham aýdanyndaǵy 15 myńnan astam turǵynnyń quqyǵy qorǵalyp, áleýmettik shıelenis joıylǵan.
Eske salaıyq, buǵan deıin Almatyda jalǵan shot-faktýralar arqyly memleketke 245 mln teńge shyǵyn keltirgender sottalǵanyn habarlaǵanbyz.
