Almatyda 15 myń qyz adam papıllomasy vırýsyna qarsy vaktsına aldy
ALMATY. KAZINFORM — Almatyda adam papıllomasy vırýsyna (HPV) qarsy vaktsınatsııalaý júrip jatyr.
Almaty onkologııalyq ortalyǵy dırektorynyń orynbasary Raıhan Bolatbekovanyń aıtýynsha, naýqan bastalǵaly beri 11–13 jas aralyǵyndaǵy 15 398 qyz bala ekpe alǵan. Onyń ishinde 2024 jyly vaktsınatsııadan 5077 qyz ótse, byltyr bul kórsetkish 7544 bolǵan. Bıyl qańtar-mamyr aılarynda taǵy 2777 jasóspirim ekpe salyndy.
— Vaktsınadan Almatyda aýyr janama áser alǵan birde-bir adam tirkelgen joq. Bul qoldanylyp jatqan vaktsınanyń tolyq qaýipsiz ekenin dálel bola alady, — dedi Raıhan Bolatbekova.
Onyń aıtýynsha, 2026 jyldyń mamyr aıynda Qazaqstanda 14 jastan 17 jas 11 aı 29 kúnge deıingi jasóspirim qyzdarǵa arnalǵan qosymsha vaktsınatsııalaý jumysy resmı túrde bastaldy. Vaktsınatsııa ata-ananyń nemese zańdy ókilderdiń jazbasha kelisimimen erikti túrde júrgiziledi. Ekpe mektepterdiń, kolledjderdiń medıtsınalyq kabıneti men aýmaqtyq emhanalarda uıymdastyrylǵan.
Sondaı-aq maman vaktsınanyń bedeýlikke alyp keletini týraly aqparat jalǵan ekenin atap ótti. Aıtýynsha, vaktsına quramynda tiri vırýs joq jáne ol aýrý týǵyzbaıdy.
— HPV-ge qarsy vaktsına bedeýlikke alyp keledi degen pikir — ǵylymı turǵyda joqqa shyǵarylǵan jalǵan aqparat. Kerisinshe, vaktsına jatyr moıny obyrynan qorǵaı otyryp, reprodýktıvtik densaýlyqty saqtaýǵa kómektesedi, — dep túsindirdi Raıhan Bolatbekova.
Almaty onkologııalyq ortalyǵynyń málimetinshe, skrınıngtik baǵdarlamalar men profılaktıkanyń ulǵaıýynyń arqasynda qalada jatyr moıny obyry men obyrǵa deıingi jaǵdaıdy erte anyqtaý kórsetkishi artqan. Qalada jyl saıyn jatyr moıny obyryn erte anyqtaýǵa arnalǵan skrınıngten 90 myńnan astam áıel ótedi. 2025 jyly osy dıagnozben 179 patsıent esepke alynǵan, olardyń 60%-dan astamynda aýrý birinshi satysynda anyqtaldy.
Eske salaıyq, krýızdik laınerde tirkelgen hantavırýs jańa vaktsınany jasaýdy jedeldetti.
