Almatyda 15 myń adam turaqty jumysqa ornalasty
ALMATY. KAZINFORM – Almatyda jyl basynan beri 20 myńnan astam adam jumyspen qamtyldy. Onyń 15 myńy turaqty jumysqa ornalasty. Bul týraly brıfıng barysynda Almaty qalasynyń halyqty jumyspen qamtý ortalyǵynyń dırektory Ádilet Jańabaev aıtty.
Ortalyqtyń málimetinshe, jyl basynan beri megapolıste 22 myń almatylyq jumysqa tartyldy. Onyń 15 myńy turaqty jáne sýbsıdııalanatyn jumys oryndaryna ornalastyryldy. Jyl sońyna deıin qalada keminde 87 200 jańa jumys ornyn ashý josparlanyp otyr.
– 2024–2029 jyldarǵa arnalǵan eńbek naryǵyn damytý tujyrymdamasy aıasynda bıyl Almatyda 8,3 myń jańa jumys orny ashyldy. Onyń 98,2 paıyzy – turaqty jumys. Jalpy jospar boıynsha 2025 jyly 87,2 myń jumys orny qurylýy tıis, onyń 73,3 myńy – turaqty jumys», – dedi Ádilet Jańabaev.
Spıkerdiń sózinshe, qysqamerzimdi kásibı oqytý men jastar tájirıbesi baǵdarlamalary da tabysty iske asyrylyp jatyr.
– Baǵdarlama sheńberinde memleket oqyp jatqan azamattarǵa aı saıyn 43 574 teńge kóleminde stıpendııa nemese 20 AEK mólsherinde eńbekaqy tóleıdi. Sonymen qatar, oqý ortalyqtaryna nemese jumys berýshilerge oqytý qyzmeti úshin memleket aı saıyn 70 myń teńge beredi. Oqýdy aıaqtaǵan azamattardy jumys berýshi keminde 6 aıǵa jumysqa alýy tıis, – dep túsindirdi ol.
2025 jylǵy 16 maýsymdaǵy jaǵdaı boıynsha oqýǵa 167 adam jiberildi. Olardyń 70-i oqýdy aıaqtap, 47-si jumysqa ornalasty. Qazir 31 mamandyq boıynsha 763 bos jumys orny bar. Olardyń qatarynda tiginshi, shashtaraz, avtoelektrık, kondıter, satýshy jáne basqa da kásipter bar.
Sonymen qatar, jumyssyz azamattar kásibı daǵdysyn tegin rastaý múmkindigine ıe boldy. Osy maqsatta vaýcherlik júıe engizildi.
– Bir rettik vaýcher azamatqa óziniń kásibı biliktiligin rastap, jumys tájirıbesi men daǵdysyn dáleldeýge múmkindik beredi. Bul óz kezeginde jumysqa ornalasýdy jeńildetedi. Vaýcherler kásibı biliktilikti taný ortalyqtary arqyly beriledi jáne jumyssyzdar úshin bul qyzmet tegin, – dep atap ótti Ádilet Jańabaev.
Vaýcher alý úshin azamattyń «jumyssyz» mártebesi bolýy, Career Enbek platformasyna tirkelip, jeke kabınet arqyly onlaın ótinish berýi qajet.
Biliktilikti taný myna salalar boıynsha júrgiziledi:
– týrızm;
– qonaq úı bıznesi;
– aqparattyq tehnologııalar;
– áleýmettik qyzmet kórsetý.
Eske salaıyq, buǵan deıin mamyr aıynda elektrondyq eńbek bırjasynda 86 myń bos jumys orny usynylǵany týraly jazǵanbyz.