Almatyda 15 qyrkúıekten bastap kemirgishterge qarsy dárileý júrgiziledi
ALMATY. KAZINFORM – Bıyl 15 qyrkúıek pen 25 qazan aralyǵynda Almatyda kemirgishterge qarsy kúzgi jappaı dárileý júrgiziledi.
Kommýnaldyq ınfraqurylym jáne turǵyn úı ınspektsııasy basqarmasynyń málimetinshe, jalpy kólemi 47 myń gektardan asatyn qoǵamdyq aýmaq dárilenedi. Kúzgi kezeń aıasynda mamandar jasyl aımaqtardy, ashyq bıotoptardy, kemirgishterdiń inderin, aryq jelilerin, ózender men sý aıdyndarynyń jaǵalaýlaryn, sondaı-aq qoǵamdyq kólik aıaldamalarynyń aýmaqtaryn dárileıdi. Al jeke sektor turǵyndaryna arnaıy jem tegin taratylady. Jemmen birge ony qaýipsiz ári durys qoldaný tártibi túsindirilip, tıisti nusqaýlyq beriledi.
- Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» kodeksiniń 107-babyna sáıkes, jeke jáne zańdy tulǵalar dezınfektsııa, dezınsektsııa jáne deratızatsııa jumystaryn óz qarajaty esebinen júrgizýge mindetti. Sol sebepti jeke aýmaqtar, jer ýchaskeleri, ǵımarattar men qurylystardy dárileý jumystaryn olardyń ıesi júrgizedi, - dep naqtylady basqarmadan.
Negizinen kóppáterli turǵyn úılerdiń jertóleleri, shatyrlary, baspaldaq alańdary men aýla aýmaqtarymen qatar, ortaq múliktegi deratızatsııa jumystary PIK nemese MIB qarajaty esebinen júzege asyrylady.
Eske salaıyq, elde zııankesterden qorǵanýdyń jańa bıologııalyq tehnologııasy ázirlendi.
