Almatyda 15 qazannan bastap elektr energııasynyń baǵasy qymbattaıdy

ALMATY. KAZINFORM - Almatyda «Tarıfti ınvestıtsııaǵa aıyrbastaý» baǵdarlamasyn iske asyrylyp jatyr. Bul týraly Óńirlik kommýnıkatsııalar qyzmetiniń brıfınginde QR Ulttyq ekonomıka mınıstrligi Tabıǵı monopolııalardy retteý komıtetiniń Almaty qalasy boıynsha departamentiniń basshysy Ásel Býdeneeva aıtty.

Onyń aıtýynsha, «Tarıfti ınvestıtsııalarǵa aıyrbastaý» jańa tarıftik saıasaty aıasynda «AJK» AQ 2024 jylǵa arnalǵan jelilerdi óz qarajaty esebinen 30,5 mlrd teńgege modernızatsııalaý boıynsha jumystar júrgizip jatyr. Onyń qorytyndysy boıynsha elektr jelileriniń tozýy 2,45% - ǵa tómendeıdi dep kútiledi.

Sondaı-aq departament basshysy 2024 jylǵy 15 qazannan bastap elektrmen jabdyqtaý úshin ortasha ólshengen shekti baǵa QQS-syz 29,04 teńge bolatynyn atap ótti. Tarıftiń ósýi orta eseppen 3,7% bolmaq. Onyń ishinde:

- halyq úshin QQS-syz 27,59 teńge/kVt saǵ;
- zańdy tulǵalar úshin QQS-syz 30,08 teńge/kVt saǵ;
- bıýdjettik uıymdar úshin QQS-syz 30,47 teńge/kVt saǵ;
- QQS-syz 29,04 teńge/ kVtsaǵ óndiretin tutynýshylar úshin.

Jeke tulǵalar úshin elektr energııasyn tutyný kólemine qaraı saralanǵan tarıfter:
- birinshi deńgeı úshin QQS-syz 25,06 teńge/kVt saǵ;
- ekinshi deńgeı úshin QQS-syz 33,11 teńge/kVt saǵ,
- úshinshi deńgeı úshin QQS-syz 41,39 teńge/kVt saǵ.

Eske salaıyq, buǵan deıin kommýnaldyq qyzmetter tarıfi qalaı ózgeretinin jazǵanbyz.