Almatyda 15 qarasha kúni Qarjygerler kongresi ótedi

15 qarasha kúni Almaty qalasynda Qazaqstan qarjygerleriniń XI kongresi ótedi. Onda «Tsıfrlyq teńge» jobasyn iske asyrý qorytyndylary tanystyrylady, dep habarlaıdy Kazinform agenttigi.

Atalǵan sharany QR Ulttyq Bankiniń jáne Qarjy naryǵyn retteý jáne damytý agenttiginiń qoldaýymen Qazaqstan qarjygerleri qaýymdastyǵy uıymdastyrýda.

Qarjygerler kongresiniń paneldik sessııalarynda sheteldik ortalyq bankter men qarjy ınstıtýttarynyń basshylary, qazaqstandyq memlekettik organdar men qarjy uıymdarynyń ókilderi makroekonomıkalyq saıasat pen qarjy sektorynyń ózekti máselelerin talqylaıdy.

Sonymen birge, bıyl qatysýshylar qazirgi jaǵdaıdaǵy aqsha-kredıt saıasatyn, makroekonomıkalyq turaqtylyq jáne fıskaldyq tártip máselelerin, oǵan qosa, qarjy sektorynyń kıberturaqtylyǵy men qarjy naryqtarynyń jahandyq ózgerýindegi ınnovatsııalardyń róli taqyryptaryn qarastyrmaq.

Budan bólek, kongress aıasynda «Tsıfrlyq teńge» jobasyn iske asyrý qorytyndylarynyń tanystyrylymy ótedi.

Qazaqstan qarjygerleriniń kongresi onlaın jáne offlaın formatta uıymdastyrylady. Plenarlyq sessııalar men paneldik pikirtalastardyń onlaın translıatsııasy fincongress.kz saıtynda jáne «Qazaqstan Ulttyq Banki» atty resmı YouTube kanalynda kórsetiledi.

Eske sala ketsek, ótken jyly qarjygerlerdiń mereıtoılyq H kongresinde ekonomıkany kredıtteýdegi júıeli tásilder, qarjy jáne naqty sektordyń ózara is-qımyly, saqtandyrý naryǵyn damytý, qarjylyq qoljetimdilikke tsıfrlyq tásil máseleleri jáne qor naryǵyndaǵy jańa ınvestıtsııalyq múmkindikter qaralǵan edi.