Almatyda 14 gektardan astam paıdalanylmaı jatqan jer memleketke qaıtaryldy
ALMATY. KAZINFORM — Almatynyń Túrksib aýdanynda ornalasqan jalpy aýmaǵy 14,6777 gektar bolatyn 8 jer ýchaskesi memleket menshigine qaıtaryldy.
Buǵan deıin bul jerler «Almaty ZTO» JShS-niń menshiginde bolyp, taýarlyq aýyl sharýashylyǵyn júrgizýge arnalǵan edi.
— Ýákiletti organ júrgizgen tekserý barysynda atalǵan jer ýchaskeleriniń uzaq ýaqyt boıy nysanaly maqsatyna saı paıdalanylmaǵany anyqtaldy. Osyǵan baılanysty jer ıesine anyqtalǵan zańbuzýshylyqtardy joıý týraly nusqama berilip, jerdi jer zańnamasynyń talaptaryna sáıkes paıdalaný úshin belgili bir merzim belgilendi, - dep habarlady qala ákimdiginiń baspasóz qyzmeti.
Keıingi baqylaý tekserýiniń qorytyndysy boıynsha qajetti sharalardyń tek ishinara ǵana oryndalǵany anyqtaldy. Atap aıtqanda, aýmaqty tazalaý jáne jer ýchaskeleriniń birine óńdeý jumystary júrgizilgenimen, aýyl sharýashylyǵy óndirisi is júzinde uıymdastyrylmaǵan.
Jer zańnamasynyń talaptary oryndalmaǵandyqtan, Almatynyń Jer resýrstaryn basqarý departamenti jer ýchaskelerin májbúrlep alyp qoıý týraly talap aryzben sotqa júgindi. Іsti qaraý nátıjesinde sot barlyq 8 jer ýchaskesin, jalpy kólemi 14,6777 gektardy, memleket menshigine qaıtarý týraly sheshim qabyldady.
Sot aýyl sharýashylyǵy daqyldaryn ekpeı, tek jekelegen agrotehnıkalyq jumystardy júrgizý taýarlyq aýyl sharýashylyǵyna arnalǵan jerdi talapqa saı paıdalaný bolyp eseptelmeıtinin atap ótti.
— Paıdalanylmaı jatqan jerlerdiń memleket menshigine qaıtarylýy qala aýmaǵyn tıimdirek paıdalanýǵa múmkindik berip, qalalyq ınfraqurylymdy damytýǵa jáne Almaty turǵyndarynyń ómir súrý sapasyn arttyrýǵa baǵyttalǵan jobalardy júzege asyrýǵa qosymsha múmkindik jasaıdy, - delingen habarlamada.
Eske salaıyq, buǵan deıin Mańǵystaý oblysynda quny 870 mln teńgelik 50 gektar jer memleket menshigine ótkenin jazǵanbyz.
