Almatyda 14-15 shildede jylý jelilerine gıdravlıkalyq synaq júrgiziledi
ASTANA. KAZINFORM — 2026 jyly 14 shildede Almaly jáne Jetisý aýdandarynyń aýmaǵynda Raıymbek dańǵyly — Brodskıı kóshesi — Rysqulov dańǵyly — Seıfýllın dańǵyly aýmaǵynda jylý jelilerine gıdravlıkalyq synaq júrgiziledi. Bul týraly «Almaty jylý jelileri» JShS ókilderi habarlady.
Sondaı-aq, 2026 jyly 15 shildede synaqtar Alataý jáne Jetisý aýdandarynyń aýmaǵynda ıAblochkov — Azovskaıa — Rysqulov — Serikov — Ratýshnyı — Angarskaıa — Úlken Almaty kanaly boıymen — Momyshuly — Aqqaınar kenti — Móńke bı — Boraldaı kósheleri aýmaǵynda ótedi.
Magıstraldyq jáne taratý qubyrlaryn tekserý kezinde, tańǵy saǵat 04:00–den 07:00–ge deıin qala turǵyndary men megapolıs qonaqtaryna qaýipsizdik sharalaryn saqtaý usynyldy.
— Qabyldanyp jatqan qaýipsizdik sharalaryna qaramastan, sýdyń jer betine shyǵýy, jol jabynynyń ishinara buzylýy syndy shtattan tys jaǵdaılar bolýy múmkin. Mundaı jaǵdaıda eshqandaı óz betinshe áreket jasamańyz, oqıǵa ornynan dereý ketip, bul týraly «Almaty jylý jelileri» JShS-ne myna telefondar arqyly habarlańyz: 351-27-62 (tikeleı nómir), baılanys ortalyǵy: 341-07-00 nemese 341-07-77 (qosymsha 1011 nemese 1014), sondaı-aq 109 nómiri boıynsha, — delingen habarlamada.
Atalǵan aýmaqtarda turatyn tutynýshylar úshin ystyq sýmen jabdyqtaý tolyq saqtalady.
— Gıdravlıkalyq synaqtar jylý jelileriniń, olardyń jabdyqtarynyń jaı-kúıin tekserý jáne aldaǵy jylytý maýsymyna qalanyń jylý sharýashylyǵyn daıyndaý aıasynda qubyrlardyń kúrdeli ýchaskelerin anyqtaý úshin júrgiziledi. Ýaqytsha qolaısyzdyqqa túsinistikpen qaraýdy suraımyz, — dep eskertti ákimdik ókilderi.
Eske salaıyq, buǵan deıin 2026 jyly josparǵa sáıkes 377 shaqyrym jylý jelisin rekonstrýktsııalaý jáne kúrdeli jóndeý kózdelgenin habarlaǵanbyz.
