Almatyda 13 mlrd teńgege salynǵan jolaıryq tolyqtaı ashyldy

ALMATY. KAZINFORM — Seıfýllın dańǵyly men Jansúgirov kóshesiniń qıylysynda ornalasqan kólik jolaıryǵynyń qurylysy aıaqtaldy. Nysan resmı túrde paıdalanýǵa berildi.

Kazinform agenttiginiń saýalyna jaýap bergen Almatynyń jol ınfraqurylymyn damytý basqarmasy qurylys jumystary tolyqtaı bekitilgen jobalyq-smetalyq qujattamaǵa sáıkes júrgizilgenin atap ótti. Jobanyń jalpy quny 13 mıllıard teńgege jetken.

Sonymen qatar jaıaý júrginshilerdiń qaýipsizdigin qamtamasyz etý úshin eki jerústi jáne baǵdarshamy ornatylǵan eki retteletin ótkel salynǵan.

Búgin óńirlik kommýnıkatsııalar qyzmetiniń alańynda Jetisý aýdanynyń ákimi Lázzat Jylqybaeva jańa jolaıryq mańyndaǵy qoǵamdyq keńistikti abattandyrý jumystary tolyǵymen aıaqtalǵanyn aıtty. Aýmaqtyń jalpy kólemi — 3,4 gektar.

— Munda 30,4 myń sharshy metr aýmaq kógaldandyryldy, 5,8 myń sharshy metrge brýschatka tóseldi, 7 uńǵyma burǵylandy, 3,5 gektar jerge avtomatty sýarý júıesi ornatyldy. Sonymen qatar 192 aǵash, 14 myń buta jáne 2 400 gúl egildi, — dedi aýdan ákimi.

Eske salaıyq, Seıfýllın dańǵyly men Jansúgirov kóshesiniń qıylysynda ornalasqan kólik jolaıryǵynyń qurylysy 2017 jyly bastaldy. Biraq turǵyndardyń jer ýchaskelerin májbúrli túrde satyp alý jumystaryna baılanysty joba qurylysy sozylyp ketti.

Bıyl jobany 2025 jyldyń maýsym aıynda aıaqtaý josparlandy. Alaıda qurylys jumystary kúzge deıin sozyldy.