Almatyda 135 adamdy kene shaqty
ALMATY. KAZINFORM — Almatyda 135 adamdy kene shaqty. Olardyń arasynda 84 bala. Bul týraly óńirlik kommýnıkatsııalar qyzmetinde ótken brıfıngide qalalyq sanıtarııalyq-epıdemıologııalyq baqylaý departamentiniń ókili málim etti.
Almaty qalasy sanıtarlyq-epıdemıologııalyq baqylaý departamentiniń ınfektsııalyq jáne parazıttik aýrýlardy epıdemıologııalyq baqylaý bóliminiń basshysy Almash Ahmetovanyń sózinshe, 1 naýryzdan bastap kene ınfektsııalaryna jáne halyqtyń kene shaǵýyna baılanysty medıtsınalyq uıymdarǵa ótinishterine apta saıyn monıtorıng júrgiziledi.
«Epıdemııalyq maýsymnyń basynan beri medıtsınalyq uıymdarǵa kene shaqqan135 adam júgindi, onyń 84 bala. Kórsetkish 2023 jyldyń sáıkes kezeńimen salystyrǵanda 7,3% — ǵa joǵary. Barlyǵyna shuǵyl medıtsınalyq kómek kórsetildi, kórsetkishter boıynsha kenege qarsy ımmýnoglobýlın engizildi», — dedi Almash Ahmetova.
Spıkerdiń sózinshe, Almaty qalasynyń mańy kene ınfektsııalarynyń tasymaldaýshysy ıksod keneleri taralǵan endemııalyq aımaqqa jatady.
«Osy jyldyń basynan beri qalada kene ınfektsııasy tirkelgen joq. Almatyda kene shaǵýynan zardap shekken adamdarǵa shuǵyl kómek kórsetý medıtsınalyq uıymdardyń 5 travmatologııalyq pýnktinde júzege asyrylady. Seroprofılaktıka pýnkteri kenege qarsy ımmýnoglobýlınmen qamtamasyz etilgen, qazir 19 lıtr 766 ml bar», -dedi maman.
